ГьунчIукьатIрал жяматрал арсурваврал ххаллилсса кьюкьлувасса цаннан, Маллижал ХIамидлул арс Кьурбан АхIмадовлун, вай гьантрай хьунтIиссия 80 шин.
Дуккаврил бикIу, иширттал бикIу, гьарца чулуха итххявхсса инсан, ххаллилсса учитель, ттулгу цIакьсса дусну ивкIсса Кьурбаннул аьпа баннав тIий, дакIнийн утлай, чичлай ура вай ххару.
1961 шинал мусил медальданущал школагу къуртал бувну, Кьурбан увхссар Москавуллал инженерно-физический институтравун. Ххювардай мугу къуртал бувну, увхссар Элмурдал академиялул аспирантуралувун. Хъинну физика, математика ххирасса Кьурбан Москавливва школалий зун ивкIссар учительну.
Цанна куртIну кIулсса физика, математика жагьилсса учительнал мукун усттарну дихьлай ивкIун урхха, вичIи дирхьуми хIайран шайсса бивкIун бур. Цайми школарттаягума бучIайсса бивкIун бур ванал физикалул дарс дишаврих буруган, лахьхьин.
Муния махъ Кьурбаннун гьан багьну бур Таджикисттаннайн цала гъан-маччаминначIан цала буцай душничIан. Тийхгу ва цанна ххирасса учительнал даврий зий ивкIун ур. Лайкь хьунугу ур «Отличник просвещения Таджикской ССР» ва «Отличник просвещения СССР» тIисса лахъсса цIардан. Дагъусттаннайн зана хьуну махъгу Кьурбан зий ивкIссар гава цала пишалий МахIачкъалалив.
1995 шинал дарсру дихьлан ивкIун ур Дагъусттаннал ЧIяву профиллал лицейраву. Шикку хIалал дурну дур «Дагъусттан Республикалул лайкь хьусса учитель» тIисса цIа. 2006-ку шинал ванал ларсун дур «Учитель года» цIагу.
Кьурбан уссия ххаллилсса зунтталчу, хъярч-махссарагу ххирасса, бусан-учингу кIулсса, кумаг аьркиннал чIарав ацIан хIадурсса, шяраваллил иширттавух хьхьичIунну гьуртту шайсса инсан. Кьурбан, цанма ххирасса, цува ххирасса кулпатгу, кIива душгу кьабивтун, чIун дакъасса бивкIулул жуятува личIи увну 16 шин хьуну дур. Ванал дустуран, учениктуран ва кIулминнан ванал тIивтIусса ненттабакI, пиш тIисса лажин, иминсса ихтилат тачIавгу хъамакъабитантIиссар.
ГьунчIукьатIрал ккурандалул председатель
ХIажибутта ХIусайнов
