Вай гьантрай, Дагъусттаннал БакIчи Сергей Меликовлул тапшур бувну, Лакрал райондалийн увкIунни ДР-лул шяраваллил хозяйствалул министрнал хъиривчу Зураб Куччаев.

Июнь зурул 18-нний ларчIсса гъараллал ва бивчусса чIакрал цаппара зунттал районнай зарал биян бунни социал объектирдан ва ххуллурдан, мукунма хъунмасса зарал бивунни хъу-лухччинун.

Зураб Куччаевлул, райондалул ОСХ-лул ва экономикалул отделданул хъунама Макьсуд Кьадиевлущал, граждан обороналул ва ЧС-рал хъунама Надир ХIасановлущал, Лакрал ва Ккуллал районнал шяраваллал бакIчитуращал ва администрациялул зузалтращал ххал дунни гъараллая ва чIакрая ххишалану зарал бивсса хъу-лухччи.
Ванал бувсунни, Дагъусттаннал БакIчи Сергей Меликовлул тапшур бувну, гъараллая зарал бивсса районнай дантIишиву цуксса зарал бивну бурив кIул бансса давуртту. Муния махъ ххалбигьинтIишиву бивсса зарал лахъаврил ва жяматран кумаг баврил масъала.