Аьрасатнал байрандалул кьинилун хасну Дагъусттаннал БакIчи Сергей Меликовлул шадлугърал даражалий хIукуматрал наградартту дуллунни хьхьичIунсса ккаккияртту хьун дурсса дагъусттанлувтуран. Республикалул социал-экономика, культура ва искусство хьхьичIуннай давриву, халкьуннал дянивсса дусшиврул ва хIала-гьурттушиврул арарду цIакь давриву бивхьусса захIматран бюхттулсса кьимат бишлай, Дагъусттаннал культуралул зузалтрал профсоюзрал комитетрал председатель, политикалул элмурдал доктор, профессор Буттаева Марзижат АхIмадовнан дуллунни «За заслуги перед Республикой Дагестан» тIисса ларайсса награда.
КIицI лаганна Марзижат АхIмадовна лакрал миллатралгу, лакку мазралгу бучIантIимуний хъуннасса дакI цIуцIаву дуллалисса, гьар ишираву миллатрал чIарав бацIлацIисса, уздансса лаккудуш бушиву. Элмулул ххуллий бикIу, къуллугъирттай бикIу, цила хьхьичIуннайшивуртту Марзижат Буттаевал чIярусса шиннардий бувсса хъунмасса захIматрайну лайкь дурссар.
Марзижат АхIмадовнайн вихшала дурну дуссия «Народный фронт «За Россию» тIисса Дагъусттаннал региондалул отделениялий каялувшиву даву. ХIукуматрал хъунаманал бувсса хIукмурдал ялув бацIавуртту дуллай, ми цукун щаллу буллай буссарив ххал бигьлагьаву – къабигьасса къуллугъ бур. Укунсса тIалавшиннарду гьарзасса, хъуннасса жаваблувшиву дусса къуллугърай зунсса даврил опытгу, кIулшивурттугу дусса хъамитайпа жула миллатраясса бушивугу пахру бан лайкьсса иш бур.
Марзижат АхIмадовнал оьрмулуву язи бувгьумур агьаммур ххуллугу бур хъаннил масъаларттан хас бувсса. Мунил хIакъиравугу бацIаву дакъа дуллайнма бур хъаннил оьрму бигьа баву мурадрайсса давуртту.
– Барчаллагьрай бура, ттула захIматран лавайсса кьимат бивщуну, ПаччахIлугърал премия дулаврихлу. Хаснува барчаллагь тIий бура, билаятгу, регионгу хьхьичIуннай даву мурадрай, хъуни-хъунисса ишру бартбигьлагьисса Дагъусттаннал БакIчи Сергей Меликовлуйн.
Ци къуллугърай зурчагу, инсан хьхьичIа-хьхьичI ас-намус бурувччуну, инсаншиву ядурну зун хIарачат буллан аьркинссар. Му тарап дургьуну зий, ттуятува агьали рязи бан, миннан, чансса бунугу кумаг бан хIарачат буллай зун бикIара нагу, – тIий бур Марзижат АхIмадовна.
ДакIнийхтуну барча дуллай буру, Марзижат АхIмадовнай, вил лайкьсса награда. ЧIа тIий буру цIакьсса цIуллушиву, талихI, тирхханну, оьрмулуву тIайлабацIу!
