Аьрасатнал кьинилун хас дурсса байран кIицI лаглагисса кьини «Мы – граждане России!» тIисса щалагу Аьрасатнал акциялул лагрулий Лакрал райондалул администрациялий аьрасатлувнал паспортру буллунни ацIния мукьра шин бартларгсса дуккавриву ва спортраву хьхьичIунсса ххуттайсса мяйя дуклаки оьрчIан.
Оьрмулуву яла агьаммур документран ккаллисса бакIрал чагъар Аьрасатнал чIарасса никирахьхьун буллай, Юсуп МахIаммадовлул увкунни: «ХIакьину, паспортру лавсун махъ, зуя хьуссар бюхттулсса билаятрал гражданинтал, зул хьхьичI буссар бигьа бакъасса ххуллу. Балугъравун бивсса оьрмулул ххуллий ххуллухъин тIий, зущал архIал бачиннав тIий буру тIайлабацIу! Зува чув бухьурчагу, кьадарданул чунмай бичирчагу, хIарачат бувара лайкьну ларсун бачин аьрасатлувнал цIа! Буруччияра зула бакIрал чагъар, дуруччияра аьрасатлувнал цIа!».