Лакрал райондалий кIицI ларгунни билаятрал ца яла агьаммур паччахIлугърал байран – Аьрасатнал кьини.
Мероприятие дайдирхьуна райондалул бакIчи Юсуп МахIаммадовлул ва хасъсса аьралий операция нанисса кIанттава кутIасса чIумуй игьалаган увкIсса Заур Маммаевлул Аьрасатнал ттугъ гьаз баврийну. Муния махъ хьуна Олег Газмановлул Аьрасатнахасса балайлухун Гъумучиял оьрчIал магьирлугърал школалул флешмоб.
«Ххирасса гьалмахтал, жуватува гьарма хъанай ур Аьрасатнал бутIа. Аьрасатнал кьини – му билаятрал тIайлабацIу цаламур захIматралгу бияла бушиву бувчIлачIисса цума-цагу аьрасатлувнал байранни.
ХIакьину Аьрасатнал хьхьичI бавцIуну бур агьамсса мурадру, ми дузрайн букканшиврул цачIун бан аьркинссар гьарцаннал гужру.
Жула буржри кьуват ва цашиву цIакьсса билаят жула наслулун кьабитан», – увкунни Юсуп МахIаммадовлул, бавтIминнахь байран барча дуллай.
Аьрасатнал кьинилул байрандалул тарихрая бувсунни КIундиннал школалул директор Абакар Гуйдалаевлул. Агьали барча бунни Лакрал ва Ккуллал районнал прокурор ХIусайн Аьлиловлул, райондалул Хъунисриннал советрал вакил Сократ Дандамаевлул ва цайминнал.
Цалчинсса гьантлия хIакьинунин Украиннал аьрщарай нанисса хасъсса аьралий операциялий гьуртту хъанахъисса Хьурттал шяраватусса Заур Маммаевлул бувсунни тикку къучагъну талатисса Дагъусттаннал жагьилтурая. Барчаллагьрай кIицI лавгунни райондалул агьалинал ва Юсуп МахIаммадовлул чIарав бацIаву асар хъанай, захIматсса тагьардануву жула аьралитурал дакIурдиву гьавасгу, чурххаву кьуватгу ххи хъанай бушиву.
Муния махъ райондалул администрациялул ХIурматрал грамотартту дуллунни Гъумучиял детсадрал хъунмур Лиана Муртузялиеван, Хъурхърал школалул байбихьулул школалул учительница Соня Унчиеван, ДР-лул ПаччахIлугърал грамота дуллунни ГьунчIукьатIрал шяраваллил бакIчи МухIад Штанчаевлун.
Хъирив райондалул Магьирлугърал къатлул зузалтрал ва Гъумучиял оьрчIал магьирлугърал школалий тарбия хъанахъиминнал ккаккан дурунни ватандалухасса балайрдал концерт.
Аьрасатнал кьинилун хас дурсса байранну хьунни райондалул гьарца школалий ва Гъумучиял кIивагу оьрчIал багъраву. ОьрчIал щаллу дунни Аьрасатнал ва Дагъусттаннал гимнру. Бувккунни ватандалухасса шеърирду, увкунни балайрду. Дурунни викторинартту.
