Уттигъанну ГьунчIукьатIув хьунни шяраваллил тарихрал ва архитектуралул гьайкаллавасса цану хъанахъисса Ххурухан­ттил ламу бакьин баврин хас дурсса субботник.

ЦалархIал тарихрал хазнанугу, архитектуралул гьайкалнугу хъанахъисса ламу хIакьинугу цилва тIайланмасса буржру щаллу буллай бур. Ччяния шийнмайва шяравун МахIачкъала-Гъумучи трассалия цамур, ттизаманнул тIалавшиннардугу щаллу дурну, бувсса ххуллу бунугу, Ххуруханттил ламу ттигу-шилагу шяраваллил инсантуран чара бакъа аьркинну бур. Шикку хьусса субботникрал ялувсса ихтилат хьунни жул ГьунчIукьатIрал шяраваллил администрациялул бакIчи МухIад Штанчаевлущал ва шяраваллил дянивмур даражалул школалул директор Малик Къушиевлущал.

– Та-духьурчангу, ГьунчIу­кьатIрал шяраву давуртту щири­къаркIусса, ци-дунугу къадуллалисса чIун къадикIай. Ванияр шинал хьхьичI шяраву чара бакъа дуван аьркинсса давурттавасса цану дия цIусса хIатталу даву. Шяраваллил агьалинал батIаврий хIукму бувссар, комиссиягу сакин бувну, къушлия кIи-кIиазарда къуруш дартIун, ва даврилсса буван. Шяравумигу, республикалий ва щаллагу дунияллий ялапар хъанахъимигу лагма лавгун, щаллу хьуна ва даву. Гьашину жяматрал пикри бунни, хIатталлин аьркин дан дартIун, лирчIсса 138 азарда къурушгу ишла дурну, вайннуцIун ттигу дартIун, шяравату хIатталлил чулухунмай нанисса ламулсса буван. Мукунна хIатталлий ишла дувансса плитардугу щаллу дуван ва бярату нанисса щинансса цIусса канализациягу дуван.

Ламу бувну бивкIун бур 1925 шинал Ссугъращатусса Булач тIисса чарил усттарнал. Ламу ккаккан, ваничIа суратру рищун туристъталгу бучIай чIун-чIумуй. 1983-ку шинал, гьанурдугу цIакь бувну, ва ламулсса бувссия, Аьбдуллаев Анаслул арс АхIмад хьхьичIунну, шяраваллил арамтурал.
Ва ххуллухь баян бувсса субботникрайн шяраву буцирив арамтал бувккуна, шайми шагьрулиягу бувкIуна. Субботникрай аьмну гьуртту хьуна 45 адамина. БучIан къавхьуминнал арцуйнусса ххуйсса кумаг бувунни. Тти дуванмургу чансса да­къассар.

Аьркинсса материал ласавриву, сакиншиндарайн багьай­сса масъалартту щаллу бавриву хъунмасса захIмат бувна бувчIусса комиссиялул хъунама Юсуп ТIагьировлул. Оьрмулул шиннах къабурувгун, хIала бувххун, хьхьичIунну зий бия уссурвал АхIмад ва Аьли Аьбдуллаевхъул, цайми-цаймигу чиваркI. Ттула чулухагу, администрациялул чулухагу хъунмасса барчаллагь тIиссара шяраву дуллалисса гьарцагу давурттацIун кумаг буллалисса гьалмахтурахь. ДакIнийхтунусса барчаллагь тIий ура шяравусса жагьилтурахь, кувннал чIарав кув бацIлацIисса, гьар иширавух хIала бусса, – тIий ур МухIад.

– Ванияр сайки ттуршра шинал хьхьичI бувсса ламул тарихрая чивчуну бур хьхьичIавасса ца луттирай. 1995-ку шинал, капитал ремонт дуван багьлай, щалла шяравалу дурккун, ламу хъинну ххуйну бакьин бувссар, ялттусса аьрщи марцI дурну, дирххун, дуркьун, дирхьуну муххал къери, бетон бувтIуну. Ва даврил сакиншиндарал­ссагу га чIумал бувссия Жаруллагь Керимовлул каялувшиндарайсса ГьунчIукьатIрал шяраваллил фондрал. Хъуннасса хъар цайнна ларсъссия Шамил Штанчаевлулгу.
Ваниннингу, 1983-ку шинал, шяраваллил советрал председательну Сулайманов Забибуллагь (аьпа биву) уссу чIумалгу цIакь бувссар ламул гьанурду.

Ттигу, шинну най, гъарал ларчIукун, нехру дуклай, ламул гьанурдугу хIура бувккун бия. Ва ххуллухьмур ремонт Ххуруханттил ламул тарихраву шамилчинмур хъанахъи­ссар. Ва ламу жяматран чара бакъа аьркинсса ламур, ванийх щарнил хIатталлийнгу, хъу-лухччайнгу инсантал занай бушивугу хIисаврайн лавсун, шяраваллил администрациялул ва ккурандалул хIукму бувна ва буруччин, ябуван, багьайсса куццуй бакьин буван.

Субботникрай гьуртту хьун шагьрурдаягу бувкIуна, шяраваллил ккурандалул председатель ХIажибутта ХIусайнов, ванал цалчинма хъиривчув Кьурбанаьли Ибрагьимов, Ширвани Дандамаев хIалану. Оьрмулул бугьарами хIарачат буллай бия жагьилтураяр махъун къабагьан, хаснува Айдамир Къушиев, Аьбдул Аьбдуллаев, АхIмад Аьбдуллаев, Абакар Рамазанов, Сократ Дандамаев. Гьарцаннай бакIра-бакIрах къаацIланна, шяравусса цинявппагу арамтал бур ва давривух хIалану. Хаснува жагьилтурал хъунмасса захIмат бувна ламул лув бетон бутIлай.

Ва давриву цайнна хъуннасса хъар ларсунни шяраваллил администрациялул бакIчи МухIад Штанчаевлул. Нехгу чулухух дирхьуну, ламул гьанурдавун бетон бувтIуну махъ, ттиния тихуннайгу дувансса давурттан аьркинмур гьарзат ларсун ду­ссар, – буслай ур Малик.