«Аргументы и Факты – Северный Кавказ» кказитрал Хъаннил байрандалун хасну дунни «Краса кавказской политики» тIисса цIанилусса конкурс. Ваний цалчинсса кIану бувгьунни Дагъусттаннал культуралул министр Зарема Буттаевал.

Конкурсрай гьуртту хьун ва изданиялул язи бувгьуну бия Ухссавнил Ккавкказуллал Федерал округрал гьарца региондалиясса кIи-кIива хъамитайпа. Вайннал суратру дирхьуну дия «АиФ Северный Кавказ» сайтрай, шикку бюхълайгу бия ччимунихлу чIу булун.

«АиФ» кказитрал ва ванил буккултрал чIурду булаврил хIасиллайну ххув хьусса шанма хъамитайпалул-къуллугъчинал цIарду кIул хьунни мартрал 8-нний: 1-мур кIанай бур Да­гъусттаннал культуралул министр Зарема Буттаева, 2-мур кIанай – Къарачай-Чаргаснал кIулшиву дулаврил министр Инна Кравченко, 3-мур кIанай – Дагъусттаннал Республикалул оьрчIал ихтиярду дуруччаврил уполномоченный Марина Ежова.
Конкурсрай гьуртту хьу­сса Ухссавнил Ккавкказуллал 14 чиновницал дянив Зарема Буттаевахлу буллуну бия 8868 чIу (43%), Инна Кравченкохлу – 8601 чIу (42%), Марина Ежовахлу – 1026 чIу (5%).

Къарачай-Чаргаснал захI­матрал ва соцразвитиялул министр Динара Камурзаевахлу буллуну бия 621 чIу, Ухссавнил АьсатIиннал кIулшиву дулаврил ва элмулул министр Элла Аьлибековахлу – 387, Ставрополлал крайрал кIулшиву дулаврил ва элмулул министр Мария Смагинахлу – 192, Ставрополлал крайрал Думалул председательнал хъиривмур Ольга Дроздовахлу – 105, Ингушетиянал культуралул министр Залина Льяновахлу – 153, Ухссавнил АьсатIиннал вице-премьер Альбина Плаевахлу – 189.
Ингушетиянал вице-премьер Эсет Боковахлу буллуну бия 21 чIу, Чачаннал вице-премьер Аьйшат Кьадировахлу – 78, Чачаннал БакIчинал ва ХIукуматрал администрациялул каялувчинал цалчинмур хъиривмур Ххадижат Кьадировахлу – 51, Къабардин-Балкьарнал парламентрал спикер Татьяна Егоровахлу – 45 ва Нальчик шагьрулул бакIчинал хъиривмур Земфира Атмурзаевахлу – 78.

Ххариссару, пахрулийссару, ца Ухссавнил Ккавкказнаву бакъа, щалвагу Аьрасатналгу, щаллара дунияллулгу лагрулийсса конкурсирдайгу щак бакъа хьхьичIунсса кIанттун лайкьсса, бакIралгу, аькьлулулгу бювхъусса, ххаллилсса жулва министрная, гьарца тIулуву бавкьусса лаккудушния.

Бадрижамал Аьлиева