Мартрал 6-нний МахIачкъала шагьрулул музейраву хьунни цIа дурксса суратрищу Камил Чутуевлул цаллалусса «Лицом к лицу» тIисса выставка тIитIлатIисса шадлугъ.
Ваний гьуртту хьусса личIи-личIисса министерстварттал ва идарарттал вакилтурал, уртакьтурал, дустурал бувунни хъин-хъинсса ихтилатру.
«Лицом к лицу» выставкалий дирхьуну дур 1960-ку шиная 2018-ку шинайн дияннин рирщусса 100-ннийн дирсса суратру: чIяву миллатру бусса жулла республикалул машгьурсса ва укунмасса инсантурал, мюрщи оьрчIал ва къари-къужрал.
Выставкалун дирзсса «Лицом к лицу» тIисса цIанил цилагу тIисса куццуй, шиккун бувкIми лажин лажиндарайну хьунабакьлай бур Камил Чутуевлул суратирттайсса личIи-личIисса миллатирттал, пишардал ва оьрмулул инсантуращал.
Камил Аминовичлул цаллалусса (персональная) выставкардал ккал дулларча, ва ххуллухьмур хъанай дур 17-чинсса. Цайминнащал хIала-ккалану хьуми выставкардал ккаллив ччянира дяйркьуну дур.
ХIисав-ккал дуван захIматсса выставкардайгу гьуртту хьуну, пишалул кьюлтIшивурттугу ччянира аьч дурну, куртIшивурттугу виттириркIусса фотографнал тIива: «ЦIуну дуллалисса гьарцагу выставкалий дакI цалчин кунна ват-ват тIий дикIай, ттунма цимурца кIулсса кунмасса асаргу къабикIай». Вай мукъурттилгу исватну чIалачIи дуллалиссар ва пишакарнал язими лишанну.
Дагъусттаннай ва икъавсса кIану бушиву къакIулли. Ванащалсса хьунабакьаврия, ва цалла шяравун учIаврия ххари шайсса акъа инсан ушивугу къакIулли. ХIакьинугу, чIявучил кIунттихь ччикунсса ва ччиссаксса суратру дувансса телефоннугу, цайми-цайми каширдугу дусса заманнай, ваналми суратру тIалавну душиврул иш бухьунссар ванал ляличIисса гьунардануву, магьиршивруву. Искусствалул журардаву яла захIматмунин ккаллину дур портрет. Ванал рирщусса инсантурал суратру дур тарг тIисса, рухI дусса, цийваманал хасият чIалачIи дуллалисса. Авторнал творчествалуву ляличIисса кIану бугьлай бур лухIисса ва кIяласса суратрал.
«Лицом к лицу» выставка тIиртIуну дикIантIиссар майрал 10-ннийнин. Насияра ккаккан, зияратрай бацIан, Камиллул караматсса суратирттал асарданул ясир буван!
Бадрижамал Аьлиева
