ЦIуссалакрал райондалийсса ЦIуссамихилтIиял шяравасса позывной «Мага» цIа дусса аьраличунал хасъсса аьра­лий операциялий гьуртту хъанахъиссаксса хIаллай, ккаккан бунни цува хIакьсса патриот ва ларайсса къирият дусса къучагъ ушиву. 2022 шинал июньдалий МахIаммад Сайгидов, хушрай кьутIигу чирчуну, СВО-лий гьуртту хьун лавгссия. Хасъсса полигондалий аьралий ученияртту дуллалисса чIумалва ванал ккаккан бувну бия цува низам дусса, нигь-ццах дакъасса аьраличу ушиву.
Дяъвилул ишру нанисса кIанттурдай талай, штурмовик МахIаммадлун бувчIуну бур Ххувшаву ласаврил цIанийсса ххуллу бигьасса къабикIантIишиву, яхI-ссавур дан, чувшиву ккаккан дан аьркиншиву. Аьралитал бусса позицияртту буруччаву мурадрайсса яла захIматми заданиярттугу ванайн тапшур дайсса диркIун дур.

МахIаммад буслай ур Лиманнал чулухуннайсса аьнтсса талатавурттаву ххишалассагу къириятгу, кьянкьашиву ккаккан дан багьлай бивкIшиву. Ва цувагу Украиннал аьрщи нацистътурацIа мурахас дуллай буллалисса захIмат къучагъшиврун ккалли буллай акъарча, аьра­литурал буржну хIисав буллай ур.

2024 шинал июль зуруй Макеевка поселокрай МахIаммад кIусса щаву дирну уссия. Хъунмасса хIал хьуссия ванал хъин хъанай, ччаннай ацIаннин. Хъин хьуну махъ, аьраличу цала гьалмахтурачIан зана хьуну, цIунилгу талай уссия. 2026 шинал МахIаммадлуйн кIилчинсса щаву дирну, Москавлив Бурденкол цIанийсса госпиталлай хъин хъанай уссия. ЦIана МахIаммад зана хьуну ур цала буттал шяравун – цахара дуаьрдай ялугьлай бивкIсса нитти-буттачIан.