Дагъусттаннайнсса аьрххилул лагрулий Аьрасатнал лайкь хьусса артистка Жасмин хьунабавкьунни Дагъусттаннал бакIчинан кIанайсса Федор Щукиннущал.

Ванал барчаллагь увкунни Жасминнухь ва ванил кулпатрахь кьини дурксса чIумал Дагъусттаннан кумаг баврихлу. Федор Щукиннул ххал бивгьунни Жасминнущал ванил дуллусса арцу социал объектирдан харж даврил масъала. Бакьин бувну, зузи бан тIий бур Каспийскалийсса оьрчIал багъ. Ва зун бикIайхту, 200-нния ливчусса оьрчIру кьамул бан хьунтIий бур. Му бакъассагу, агьали марцIсса щинал дузал баву мурадрай, Хасавюртуллал райондалийсса Адильотар, Кадыротар ва Тутлар шяраваллаву дуккан тIий дур шанна къуй. Инфраструктура дузал даву мурадрайсса сиптардайну шаназарунния ливчусса дагъусттанлувтурал ялапаршиннарал шартIру къулай хьун тIий дур.

Дарбантуллал райондалийнсса аьрххилий, Жасминнул тIабиаьтрал балардал къатта-къушлицIа бувсса инсантурахьхьун цIусса къатрал кIулли дуллунни. ЦIанасса чIумал, гуманитар программалул лагрулий зувиллий шанма Дагъусттаннал кулпатран кумаг бунни. ГьануцIакул бувсса арулва ттизаманнул къатта буллуну бур яла кумаг аьркин багьлагьиминнан: чIявусса оьрчIру бусса нитти-буттан, пенсионертуран ва захIматсса азарду дусса къашайшалтран.
– Дагъусттан – ттул чIиримур ватангур, ттул дакIгур, ужагъгур. КIулбакъа бала ялун бивну, инсантал цимурцаннуцIа хьусса чIумал, жува чIарав бацIан, шаймур бан аьркиншиврий жу щак тIий къабивкIру. Вай шанма зурул дянив хъуннасса даву дан бювхъунни. Жу къатта-къушлил щаллу барду 33 кулпат. Яла агьаммурдив – инсантуран нигьачIаву дакъашивур, оьрчIал иттав ххарисса пар ххал шавур, – увкунни Жасминнул.
Федор Щукиннул дуллунни Жасминнун «За милосердие и благодеяние» тIисса Дагъусттан Республикалул хIурматрал лишан.
– Ва награда рахIму-цIимилул аьдатру дуручлай, хъинбалартту-хъиншивуртту дуллалиминнахь дакIнийхтуну барчаллагь тIисса лишанни. Жула халкьуннайх кьини дурксса чIумал Жасминнул цила инсаншиву ккаккан дунни. Артисткал ва ванил ласнал 500 миллион арцул булунни тIабиаьтрал баларду бивсса инсантуран кумагран, региондалул инфраструктура цIу дуккан дан. Вайннал кумаграцIух дурссар цаппара къатри Дарбантуллал райондалийсса Мамедкъала поселокрай. Дайдирхьунни агьали марцIсса хIачIай щинал дузал бансса проект. Жасмин уттигу бур Дагъусттаннан кабакьу буллай. НукIура ванил дуллуну диркIсса арцух бакьин буллай бур Каспийскалийсса оьрчIал багъ, – бувсунни Федор Щукиннул.
Андриана Аьбдуллаева