КьатIувсса дяркъу, бявкъусса марч, къатлувусса пачурдил кьакьан бувсса гьава сававну жулва бурчу кIинттул, хъатрулуцIа хъанай, кьакьлан, хъяхъа тIун бикIай. КIинттул бурчуцIун бавхIусса яла цIюрувкьумур масъалагу хъатру диял къахъанахъаву хъанай бур. Бурчуя цияра дизлазисса аьгъушивугу кIинттул чан шайссар, мукунма хIурхIа шайссар бурчу цийнува цуппа цIу лагаврилмур бущигу. Мунияту кIинттул чIумал бурчуха ляличIиссава къуллугъ бикIан аьркинссар.
* * *
Шинал чIумух бурувгун жура чурххайн лаххайсса янна, гардероб даххана дувайсса кунна, бурчуха къуллугъ буллалаврил кьяйдагу даххана дуван аьркинссар, бурчу марцI буван, хъатру дуруччин ва чара бакъа аьркинсса витаминнал буччин буван.
* * *
Дяркъусса чIумал бурчул клеткарду хIурхIацIакул цIу лаглагаврийн, бурчул цилла аьгъушиву (себум) чанну душиврийн бувну, кIинттул бурчу ххарттану, бюкъавчIуну бикIайссар. ЧIяву шайссар бурчуйсса бактерияртту, мунияту лажиндараву дуклакимургу, воспалениярттугу чан къашайссар.
* * *
КIинттул лажиндарал бурчуйсса цIай буруччингу, гъинттулсса бургъил зарал биян бувсса бурчу цIу лагангу кумаг хьунтIиссар витамин С бусса кремирттая.
* * *
КIинттул бурчуха къуллугъ бувансса ниятрай ласласимуниву язи дугьан аьркинссар цал составраву гиалуроновая кислота ва глицерин бумур. Гиалуроновая кислоталул дуссар ляличIисса хасият – цилла кIушиврияр азарийлла кIусса хъатру дугьан бюхъайсса.
* * *
ЧIяруми кремирттал составраву щингу дуссар. Мунияту лажиндаравух ва каруннайх крем кьатIув буккан 30-40 минутIрал хьхьичI дурккун хъинссар, бурчувун ххуйну дюхханшиврул. КьатIув бачин хъунма хIал къаливчIсса чIумал дуркмур кремравусса хъатру, бурчувун духханнин, дякъий, мурчай гьаваллавун лагайссар, бурчугу хъиннува кьакьлан, ятIул лаглан бикIайссар.
* * *
КIинттул чIявуминнал ишла къадувай шинал вайми чIуннардий бурчу бургъия буруччин аьркин дувайсса кремру (SPF). Амма ультрафиолетовый къяртри щаллусса шинай щуруй дикIайссар. КIинттул дарщусса кьинирдайгума, ттуруллавух ва пюрундалувухгума.
* * *
КIинттул яла-яла къулагъас дуван багьлагьимур бурчу бур мурччалмур. КьатIув букканнин мурччайх дурккун хъинссар ланолин ва ретинол бусса бальзам.
* * *
Бурчугу кьакъакьлан, аьмну щалла цIуллу-сагъшиврунгу кьавкьсса гьавараясса зарал байщун бан, къатлувусса гьава хъатан бувайсса хасъсса зат дирхьуну хъинссар. Ва дакъахьурчан, лавхъсса пачлил чIарав щинащалсса тIахIни дихьлай, хъартсса янна батарейкалийн дичлай, цайми ххуллу-ххару ишла бувну. КьатIув гьава хъавтсса чIумал – форточка тIивтIуну ягу чIавахьулу дахьрасса ххярацулттий бивтун.
* * *
Дуки-хIачIиялувун ххи дуван аьркинссар чIярусса хъатру цавурагу дусса, чурххавумур хъатругу дугьан кумаг шайсса продукты. Мисалдаран, нисварти, сунув, авокадо, шпинат, манго, брокколи ва м.ц. Вайннул организм хъатрулул дакъассагу, дуччин дувантIиссар чIявусса витаминналгу, антиоксидантиртталгу.
* * *
Ва ялагу, хъамамабитари бурчугу, аьмну щалла организмгу, хъатрулулгу дурччуну, жагьилну, цIуллуну-цIакьну чIярусса шиннардий личIавриву, клеткарду багьайкун зузавриву щинал бугьлагьисса агьамсса кIану. Мунийн бувну цIакь дувара зувура аьдат: чан-чанну хIачIлай, кьинилул дянив 1,5-2 литра марцIсса щинал хIачIаван, чIавахьулттах ци гьава, ци шинал чIун дунугу, мудангу.
ХIадур бувссар
Бадрижамал Аьлиевал
