Ларгсса бувчIавурттал кьинирдай агьамсса кIану бувгьунни бувчIавурттай ялув бацIаврил штабирттал давурттал.
Сентябрьданул 21-нний хьусса пресс-конференциялий Дагъусттаннал региондалул штабрал давурттая бувсунни ДР-лул Жяматийсса палаталул председатель Амирхан МахIамаддадаевлул, бувчIавурттал ялув бацIаврил жяматийсса штабрал каялувчи Динислам Дадаевлул ва ДР-лул Жяматийсса палаталул председательнал хъиривчу Эдуард Уразаевлул.

Амирхан МахIаммад­дадаевлул тIимунийну, вай бувчIавурттал шаннагу кьини жяматийсса штабраву зузиминнан хъинну чIурусса диркIун дур. Штабраву зий бивкIун бур цаппара группартту: мониторинграл, юристътурал, информациялул, экспертътурал.
Хъунмур даву дуллай бивкIун бур штабраву зун хIадур бувну бивкIсса 20 волонтер.

Миннан сакин бувну бия техникалул дузал бувсса зузи кIанттурду, миннал диркIссар тIайланнасса видеодахIаву циняв бувчIавурттал участокирттащал. БувчIавурттал кьинирдай штабравун цимилагу бувкIун бивкIссар бувчIавурттавух гьурттусса политикийсса партиярттал вакилтал ва ца мандатрайну нанисса кандидатътал, участокирттайсса тагьарданущал кIул хьуншиврул. Штабрал давурттал ялув бавцIуну бивкIун бур АьФ-лул Жяматийсса палата.Тиха волонтертурачIан оьвчайсса бивкIун бур, гай цала кIаттурдай бурив ягу бакъарив кIул баву мурадрай. Динислам Дадаевлул бувсмунийну, царагу ккалли дансса диялдакъашиву, закондалуцIун къабакьлакьисса иш сияхIрайн лавсун бивкIун бакъар.

Эдуард Уразаевлул тIимунийну, чIурду булун чIявусса инсантал бувкIун бур, экспертнал пикрилий, мунил ккаккан буллай бур билаятрал президентнал язи бувгьусса ххуллуцIун агьали кабакьлай бушиву.