Апрельданул 19-22-нний Брянск шагьрулий хьусса Каруннай бияврил Аьрасатнал Кубокрай МахIачкъалаливсса «Восход» центрданул директор, лаваймур категориялул тренер, каруннай бияврил Дагъусттаннал сборныйлул хъунама тренер, каруннай бияврил спортрал Аьрасатнал мастер, каруннай бияврил Дагъусттаннал федерациялул вице-президент, Шахьуйннал шяравасса Зураб Аьлиевлул бувгьунни 2-сса кIану.
Кубокрай гьуртту хьуссар Аьрасатнал 37 региондалиясса 300-ннийн бивсса спортсментал. Бяст-ччал хьуссар кIира дисциплиналий: «Поединок» ва «Демонстрация техники рукопашного боя». Зураблул 2-мур кIану бувгьуссар «Демонстрация техники рукопашного боя» дисциплиналий. Ва хъанахъиссар нигьачIисса тагьардануву ци дуллан аьркинссарив, чIила, ттупанг, ттархь канихьну ххявхсса чIумалсса цалчинсса секундирттай цалла цIуллу-сагъшиву ва оьрму мюхчан буваншиврул цукун къуццу тIун, ци приемру дуван аьркинссарив ккаккан буллалисса дисциплина.
Зураб 2011-ку шиная шийнай хъунмурчIин тренерналмур даврихунни агьну усса. Бяст-ччаллал гьурттучи хIисаврай ва майданнив махъа-махъ увккун ивкIссар 15 шинал хьхьичI. Вайксса шинну ларгун махъ цалчин увккун кIилчинмур кIану бугьавугу хъинну хъунмасса ишри, цувагу цимирагу титулданул заллусса, хъунмасса опыт бусса спортсменнаяр, Дунияллул чемпионнаяр, Аьрасатнал чемпионнал цIа цимиллагу ларсъсса спортсменнаяр увагу ца-кIива баллданул махъун агьну. Зураблул вай бяст-ччаллайн вари чинсса хIадур шавурагу дувансса хIалу къархьуссар, зума дургьусса зуруй ванал дурагу ца тренировкар хьусса.
Кубокрай Зураблул ассистентну ивкIссар АьсатIиннаву ялапар хъанахъисса дагъусттанлув, каруннай бияврил Аьрасатнал сборныйлул хъунама тренер, Ухссавнил АьсатIиннал сборныйлул тренер Нариман Кьадиев.
Зураб тти буниялагу агьан ччай ур спортрал ва журалухун.
– На жулва центрданийгу тIитIин ччай ура ва направление, ва паракьат дакъасса чIумал кIулну бикIича оьрчIан цанна, цалва лагма-ялттуминнан нигьачIисса тагьар хIасул хьусса чIумал цукун къуццу тIун аьркинссарив. На ва направлениялухун агьну уссияв чIярусса шиннардил хьхьичIа, тти цIунил навагу агьан ччай ура, ттулва тарбиялувталгу бивчуну, – тIий ур Зураб Кирамуттинович.
Шиккува кIицI лаган, «Восход» спортрал центр тIивтIуну хъунма хIал къавхьунугу, шиккун заназисса оьрчIал ларсъсса ххувшавурттал ххуржинтту кIусса дур. Региондалул, щалвагу Аьрасатнал ва Дунияллул лагрулийсса бяст-ччаллай чIава спортсментурал мудангу бугьлагьиссар хьхьичIунсса кIанттурду. Шиккун заназисса оьрчIал ккал 300-нная лирчусса дур, занан ччимигу шиная шинайн чIяву хъанай бур.
ЧIа учинну ххаллилсса тренернан ва ванал каялувшиндаралуминнан цIу-цIусса ххувшавуртту.
Бадрижамал Аьлиева
