Май зурул 6-нний Каспийскалий дайдирхьунни «Ххувшаврил Ттугъ» тIисса республикалул акция. Шикку гьуртту хьун бувкIун бия Дагъусттаннал Халкьуннал Мажлисрал председательнал хъиривчутал СайгидахIмад АхIмадов ва Камил Давдиев, Халкьуннал Мажлисрал комитетирттал председательтал.
ДакIнин бутан, «Ххувшаврил Ттугъ» акция дуллалиссар Дагъусттаннал бакIчи Сергей Меликовлул сипталий 2022-ку шиная шихуннай. Гьашину акциялувух хIала буххантIиссар Ухссавнил Ккавкказуллал федерал округрал регионнугу. Проектрал лагрулий хьунтIиссар авто- ва мото-пробегру, тIитIин бантIиссар хъунмасса Ххувшаврил Ттугълил копия, школардай дишинтIиссар ххувшаврил темалийсса дарсру.
Мероприятие дайдирхьуна Аьралуннал духовой оркестрданул щаллу дуллалисса Аьрасатнал ва Дагъусттаннал гимнрайну. Лахъа-хъунну буккан бувна Аьрасатнал ПаччахIлугърал ва Ххувшаврил Ттугъру.
Хъирив дурккуна Дагъусттаннал бакIчи Сергей Меликовлул барча баву.
– ХIакьинугу Ххувшаврил Ттугълищал жулва аьралитал, хьхьичI ххуттай бавцIуну, нацистътуращал талай бур. «Каспий» тIисса хушрайсса батальондалул аьралитураву рейхстаграй Ттугъ бивщусса АьбдулхIаким Исмяиловлул арснал арсгу ур, – тIий бур Республикалул бакIчинал барча бавриву.
Дагъусттан Республикалул ХIукуматрал председатель Аьбдулмуслим Аьбдулмуслимовлул барча бувна акциялул гьурттучитал ва бусравсса хъамал: Буттал КIанттул цIанийсса Хъунмасса дяъвилул ветерантал ва гьурттучитал, жанну дуллусса аьралитурал кулпатирттавами, Палестиннал лихъачалт ва Белгородраясса оьрчIру.
Цала ихтилатраву ванал кIицI лавгуна Дагъусттаннал халкьуннан цанма ккавккун кIулшиву дяъви цирив, мунил цукунсса баларду биян байссарив, мунияту хIадурнугу бушиву кумаг аьркин багьлагьинал чIарав бацIан.
– Сайки мяйцIалла шинал хьхьичI кунма, хIакьинугу жущара, циняв цачIун хьуну, цаннал чIарав ца бавцIунур Ххувшаву ласун бюхъантIисса. Жунма Буттал кIанттул цIанийсса Хъунмасса дяъвигу, та дяъвилул виртталгу дакIний бушиву – муври жула яла цIакьмур неонацизмалийн бурган бувсса ярагъ. Бутаваннав гьавас Ххувшаврил ЯтIул Ттугълил ялун нанисса ватан дуруччултравун, – увкуна ванал.
Маршгу рурцуну, гьаз бувна Ххувшаврил Ттугъ.
Ххувшаврил Ттугъ хъанахъиссар Аьрасатнал реликвия, Буттал КIанттул цIанийсса Хъунмасса дяъвилий совет халкьуннал ларсъсса Ххувшаврил лишан.
Мероприятиялул лагрулий «Каспий» тIисса хушрайсса батальондалул аьралитуран дуллуна наградартту. ЦIуну кьамул бувминнан буллуна удостоверенияртту. Вай хIакьинува бачинтIиссар хасъсса аьралий операция нанисса кIанттурдайн.
Ххувшаврил Парадрал репетиция дурну махъ Каспийскаллал Хъун майданния дайдирхьуна «Ххувшаврил Ттугъ» автопробег. СВО-лул гьурттучи, Халкьуннал Мажлисрал депутат Аьбдуллагь МахIаммадовлул бакI дургьусса автоколонна гьантIиссар Ухссавнил Ккавкказуллал Федерал округрал регионнайн: Чачаннавун, Ухссавнил АьсатIиннавун, Къабардин-Балкьарнавун, Пятигорскалийн. Махъра-махъ колонна диянтIиссар Ингушетиянавун.
Мероприятие къуртал хьуна Каспийскаллал флотилиялул, Каспийскаллал аьралий гарнизондалул, Росгвардиялул, МЧС-рал подразделениярттал, кадетътурал, Юнармиялул марширдайну.
Андриана Аьбдуллаева
