Дагъусттаннал халкьуннал шаэр Юсуп Ххаппалаевлун 110 шин шаврин хасну

Вай гьантрай А.Къапиевлул цIанийсса Лакрал музыкалул ва драмалул театрдануву хьунни Дагъусттаннал халкьуннал шаэр Юсуп Ххаппалаевлун 110 шин шаврин хасну ва дакIнин утлатисса мажлис. Шиккун бувкIун бия республикалул къуллугъчитал, шаэрнал дустал ва даврил уртакьтал, гъан-маччами.

Юсуп Рамазанович дакIнин утлатисса, ванал творчествалун лавайсса кьимат бишлашисса ихтилатру бунни Халкьуннал Мажлисрал председательнал хъиривчу Камил Давдиевлул, Дагъусттаннал культуралул министрнал хъиривмур Мадина Жаватхановал, Дагъусттаннал Чичултрал союзрал председатель Марина АхIмадова-Колюбакинал, Дагъусттаннал бакIчиначIасса Хъунилсриннал советрал председательнал хъиривчу Шалласу Шалласуевлул, Лакрал райондалул бакIчи Зураб Куччаевлул, М.Илиясовал цIанийсса «Дараччи» ихIсандалул фондрал президент Гульшан Хасаевал, Дагъусттаннал халкьуннал чичу Мирза Давыдовлул, Дагъусттаннал Чичултрал союзрал правлениялул хъунаманал хъиривчу, Юсуп Хаппалаевлул премиялул лауреат Супиян Оьмаровлул.

Дачин дурну бия вечер Дагъусттаннал халкьуннал артист Аслан МахIаммадов ва Дагъусттаннал халкьуннал артистка Саният Рамазанова. Ихтилатирттал лях-карах ккаккан дунни литературалул ва музыкалул композицияртту, шаэрнаясса документал фильмравасса парчри, ванал личIи-личIисса мероприятиярттай буллалисса ихтилатру. Музыкалул программа тIиртIунни Дагъусттаннал халкьуннал артист Новруз Шагьбазовлул каялувшиндаралусса Дагъусттаннал халкьуннал инструментирттал паччахIлугърал оркестрданул. Шаэрнал мукъурттийсса балайрду увкунни Дагъусттаннал халкьуннал артистка Лариса ХIажиевал, Жанна Кьурбановал, Шагьалай МахIаммадовал, Арслан Шагьмардановлул, ХIажиаьли ХIажиаьлиевлул, Аьбдул Мурадовлул, Зульфия Архилаевал ва Ямлихан ХIажиевлул. Ххаллилсса къавтIаву ккаккан дунни балетрал артистътал Наргиз Давыдовал ва Дагъусттаннал ва Ингушетиянал лайкь хьусса артист Илдар АхIмадовлул. Шеърирду бувккунни Дагъусттаннал халкьуннал артист Владимир Мещериннул, Лакрал театрданул артист Руслан Лариннул, Лакку маз лахьхьаврил центрданул хъунмур ПатIимат Аьлиевал ва Центрданул дуклаки душ Шагьун Оьмаровал, МахIачкъалаллал 38-мур гимназиялул дуклаки оьрчI Даниял АхIмадовлул, ЦIуссаккуллал школалул дуклаки оьрчI Кьурбан Гудовлул. Цала-цала мазрайн таржума бувсса шаэрнал шеърирду бувккунни Дагъусттаннал халкьуннал шаэртал Багьауттин Аджиевлул ва Аминат Аьбдулманаповал.
Ххаппалаевхъал кулпатрал цIания цинявппа хъамаллурахь ва гьурттучитурахь барчаллагь увкунни шаэрнал арс Сулайман Ххаппалаевлул.

Цалчинсса шеърирдал жуж «Эшкьилул майданну» Юсуп Ххаппалаевлул итабавкьуну бур 1940-ку шинал. Мунияр махъ бувккун бур «Шеърирду ва бусаларду», «Зунттал балайрду», «Дусшиврул балайрду», «Оьрму ва щугълурду» ва чIявусса цаймигу. Юсуп Ххаппалаевлул шеърирду ва поэмарду оьрус мазрайн таржума бувну бур билаятрай машгьурсса таржумачитурал. Юсуп Хаппалаевлул цалагу таржума бувссар лакку мазрайн, Индиянал эпос «Махабхарата», арманал эпос «Сасуннал Давуд», Шота Руставелил «ЦIиникьрал луттиравусса нарт» ва чIявусса цаймигу.

Яргсса ва авадансса хха кьабивтун бур ванал оьрмулуву Апанни Къапиевлущалсса ва ванал кулпат Натальящалсса дусшиврул. «Капливун бувтсса мукъул усттар». Укунсса кьимат бивщуну бур ванал творчествалун Наталья Къапиевал. 1935-ку шинал Юсуп Ххаппалаев кьамул увну ур СССР-данул Чичултрал союзравун. Ва гьуртту хьуну ур республикалул чичултрал цалчинсса съездрай. Юсуп Ххаппалаев хъанахъиссар С.Стальскийл цIанийсса республикалул премиялул лауреат. Ва лайкь хьуссар ЗахIматрал ЯтIул Ттугълил ордендалун, кIира «Хурматрал лишандалун» ва чIярусса цаймигу наградарттан. КIицI лаган, 15-нния лирчусса шиннардий зий буссар Ххаппалаевхъал кулпатрал сакин бувсса, творчествалул ххуллийх нанисса жагьилтуран кабакьу буллалисса Юсуп Ххаппалаевлул цIанийсса фонд.