ЦIуссалакрал аьрщарайн боевиктал ххявхсса 1999-ку шин жунна тачIав хъамакъаритантIиссар. ХъамакъаритантIиссар буттал кIану буручлай къучагъшиврий жанну дулусса жула вирттаврал цIардугу. Аьрасатнал ­Виричу Мутай Исяевлул чувшиврул эбратну кьариртссар цала цIа Дагъусттаннал ва Аьрасатнал тарихраву.
ДакIнин бутан, хъуннасса агьамшиву дусса лахъазан («Телевышка») дуручлай, цукссагу ххишаласса гуж бусса душманнайн данди авцIуну жан дуллуссия Мутайл. Та чIумал ванан оьрмулул 35 шин дия. Ванал арснан Нариманнун – 6. Ряхра шин хьусса арсгу, 13 шинавусса душгу ччаннай бацIан буллай, бутталгу, ниттилгу кIану бувгьуну хъунмасса захIмат бивхьуна Аьбидатлул. Шиккува дакIнин бутан, тайва иширттаву чувшиврий жан дуллуссар Аьбидатлул уссийл милицанал сержант Аьбдул-Кьасин МахIаммадовлулгу.
– Чув битарчагу ккулла, ниттил къюкIливух буккай, – увкуну бур Дагъусттаннал халкьуннал шаэр Фазу Аьлиевал. Цимигу ниттил къюкIливух бувккунни хасъсса аьралий операциялул ккуллардугу. Ласнал, уссийл къюву дахьра куклу хъанахъисса Аьбидатлул ялун арсналссагу дивунни. Бутта куна кьянкьасса, сивсусса Нариманнунгу буттан кунна дяъвилул иширттаву (хасъсса аьралий операциялий) Ватан дуручлай жан дулун кьисмат хьунни.
Школалий дуклакисса чIумал Нариман ивкIун ур хьхьичIунсса учениктуравасса ца. МуницIун ва ивкIун ур дакIгу хъинсса, гьарнан кумаг бан чялишсса оьрчI. Школа къуртал бувну махъ ва увххун ур Москавлив Кадетътурал училищалувун. Цалчинсса шинайва училищалувугу хьхьичIунминнал кьюкьлуву ивкIун ур. 2010-ку шинал увххун ур Москавуллал паччахIлугърал медико-стоматологический университетравун. КIилчинмур курсраву Медициналул академиялул стоматологиялул факультетрайн перевод ларсун дур.
Мугу къуртал бувну, ххуйсса даврий зий, иш бавчусса Нариман, 2023-ку шинал, цимурцагу кьариртун Ватандалул мурадру буруччин хасъсса аьралий операциялийн лавгукун, ванал хасият кIулми цучIав махIаттал къавхьуна.
Хасъсса аьралий операциялий медициналул зузалтрангу тайра захIматсса, нигьал ва хьуллил дянивсса шартIирдай зун багьлай бур. СсахчIав къабурувгун, ми лайкьну бартбигьлай бур цала пишалул буржру.
Дроннал цIу дирхьусса кIанайн ачайсса ивкIун ур Нариман, щавурду дирми буккан бан. Паракьатшиву дагьанцIа ацIу тIисса дустурахьгу: «Тай чIумуй буккан къабарча, оьлицIал хьун бюхъайссар», – тIий, цайнма лавхъун буккан байсса бивкIун бур щавурду дирсса аьралийтал. ДакIнийхтуну ххари хъанан икIайсса ивкIун ур цIарава буккан бан бювхъусса аьралийтал хъин хъанан бивкIукун. ­Нариман цувагу госпитальданийн агьну ивкIун ур. Хъин шайхту, махъунай зана хьуну ур. ­Ноябрь зуруй ниттийн ­Аьбидатлуйн оьвкуну, бувсун бур арс захIматсса щаву дирну ушиву. Ва ишираву бивкIулул ххяппурттаща личин къабювхъунни Нариманнуща. Гиппократлул хъалийн ва Аьралий присягалийн хаин къавхьуну, оьрмулул 33 шинаву жан дуллунни ванал. Нариман хIурматрай увччунни ЦIуссалакрал шяраву.
ЛивчIунни яхI бусса Аьбидатгу жагьилсса оьрмулуву дунияллия лавгсса ласнал ва уссийл къювулул ялун арсналссагу дирну. Нариманнул махъ ливчIунни жагьилсса кулпат, кIия арс. Ца ттаттан цIа дирзсса Мутай, ца – Чанку.
Алжаннул ххари аннав Нариман. Ванан къабуллусса ­оьрму, ванал оьрчIан, ниттин махъми­ннан булуннав. Ссавур Аьбидатлухьхьунгу дулуннав.
Андриана Аьбдуллаева