Ватандалул Вирттаврал кьини МахIачкъалалив Экономикалул министерствалул идаралул хьхьичIсса сквердануву Аьрасатнал Виричу МахIаммад НурбахIандовлун дирхьусса гьайкалданучIа хьунни Виричу дакIнин утлатисса акция.
Шикку гьуртту хьунни Дагъусттаннал ХIукуматрал председатель Аьбдулмуслим Аьбдулмуслимов, Аьрасатнал Виричу Загьид Загьидов, цалчинма вице-премьер Руслан Аьлиев, МахIачкъала шагьрулул мэр Жамбулат Салавов, ДР-лул экономикалул министр ХIажи Султанов, ДР-лул финансирттал министр Шамил Дабишев, «Ястреб-Каспий» СОБР-данул командующий Запир Алискантов, хасъсса аьралий операциялул гьурттучитал, Экономикалул министерствалул зузалт, жяматийсса ва жагьилтурал идарарттал вакилтал.
МинутIрайсса пахъ багьаву дурну махъ митинг тIиртIунни Аьбдулмуслим Аьбдулмуслимовлул ихтилатрайну.
– ХIакьину щалагу жула билаятрай кIицI лаглай бур Ватандалул Вирттаврал кьини. Дагъусттан – Вирттаврал Ватанни. Яла къучагъми, яла ххаллилми Вирттал жулвар бусса. ХIакьинусса кьини 17 дагъусттанлув лайкь хьунни Аьрасатнал Виричу тIисса бусравсса цIанин. Жува дакIнин бичлай буру билаятрал тархъаншиву ва цашиву дуручлай бивкIми. Оьрмулул ва бивкIулул ххуттай МахIаммад НурбахIандовлул увкусса «Зузияра, уссурвал» тIисса уртакьтурайнсса аманатрал махъру ца лахIзалий ппив хьуссар щалагу билаятрайх. БивкIулул хьхьичI ссавургу, кьянкьашивугу ккаккан дурссар Аьрасатнал Виричу МахIаммад НурбахIандовлул. Хасъсса аьралий операциялий гьуртту хьуну къучагъшиврий жан дуллусса СВО-лул Аьрасатнал цалчинсса Виричу НурмахIаммад ХIажимахIаммадовгу жула дагъусттанлуври. Вирттаврал гьунардая цIанасса никирангу кIулну бикIан ва эбратну хьун аьркинссар. Дунияллул цумур мурцIний бухьурчагу, билаятрал, республикалул цIа бюхттул дуллай бухьурча жулва жагьилтал – мугу виричувшиврун ккаллиссар, – увкунни ванал.
Аьрасатнал Виричу Загьид Загьидовлул барчаллагь увкунни хасъсса аьралий операциялий гьуртту хъанахъисса аьралийтурахь ва миннал кулпатирттахь.
Ихтилатиярттая махъ цинявннал Аьрасатнал Виричу МахIаммад НурбахIандовлул гьайкалдануцI дирхьунни тIутIив.
Имара Саидова
