Дагъусттаннал Капитал ремонтрал фондрал каялувчи Нажмуттин Ханбалаев ивунни фондрал дуллалисса давуртту ххал дан Дарбантлив.

Ванал ххал дунни Приморская кIичIиравусса №4 къатри ва Агъасиевлул цIанийсса кIичIиравусса №20 къатри. Капитал ремонтрал программалул лагрулий вай къатраву даххана дуллай бур мукьра лифт. Фондрал хъунаманал ххал бунни цIусса лифтру дихьлахьисса кIанттурду, даврил графикрал ва му щаллу баврил шартIирдал хIакъираву ихтилат бунни «Кизлярский электроаппаратный завод» АО-лул подрядный организациялул вакилтуращал.
– Лифтру дикIан аьркинссар инсаннан нигьачIаву дакъасса, гьарица механизм – ттизаманнул стандартирттайсса. Давуртту дурну дикIан аьркинссар ларайсса даражалий, – кIицI лавгунни ванал.
Дарбантливсса къатраву лифтру дишаву хъанахъиссар республикалий лифтру цIу дуккан дуллалисса хъунна­сса программалул ца бутIану. Аьмну 2025-ку шинал ­даххана дан ккаккан бувну бур 23 чIяву квартирарду бусса къатравусса 62 лифт. Миннува 52 – МахIачкъалалив, 6 – Каспийскалий, 4 – Дарбантлив. ХIакьинусса кьини 58 цIусса лифт зий дур. Капремонтрал объектру бусса кIанайн занай, мудангу ххал дуллантIиссар цукун най дурив давуртту. Мудан дуллантIиссар программа щаллу даврил мониторинг, жяматийсса хъиривбацIулт ва депутатъталгу кIункIу бувну. Мунийну харж дуллалисса арцул ялув бацIаву дикIантIиссар жяматрал чулуха.

Андриана Аьбдуллаева