[dropcap]И[/dropcap]юльданул 11-нний Дагъусттаннал Журналистътурал союзрал бувчIавуртту дуллалисса конференциялий Республикалул Журналистътурал союзрал хъунаману увчIунни лазгиял кказитрал хъунама редактор МахIаммад Ибрагьимов.
Ва къуллугърайн кIия кандидатнал цIа рирщуну дия: ДГУ-рал журналистикалул отделениялул печатьрал СМИ-рдал кафедралул хъунама ХIамид Аьбдуллаевлул ва «Лезги газетрал» хъунама редактор МахIаммад Ибрагьимовлул. Конференциялий ХIамид МахIаммадовлул бувсунни цува, Дагъусттаннал муфти АхIмад-хIажи Аьбдуллаевлул маслихIатрайн бувну кандидатура дукьлай ушиву.
ЦIусса хъунаманал кандидатура хъинчулий ккаклакисса ихтилатру бунни Дагъусттаннал БакIчинал ва ХIукуматрал администрациялул информациялул политикалул хъунама Рашид Акавовлул, «Илчилул» хъунама редакторнал хъиривчув Руслан Башаевлул, «Дагъусттаннал правда» кказитрал хъунама редактор Бурлият Токболатовал. Вайннал кIицI лавгунни МахIаммад хъунама редакторну увчIуния махъ кказитрал даву аьлтта чIаланну ххуйсса даражалийн гьаз хьушиву. Цинявннал чIурду буллуну увчIунни МахIаммад Ибрагьимов.
Ванал цала ихтилатраву, дурсса вихшалдарахлу барчаллагь тIий, бувсунни миллатирттал СМИ-дай зузими хIадур булланшиврул ДГУ-рал филологиялул факультетрай оьрус-дагъусттан отделениялул студентътуран стипендияртту, премияртту дуллансса фонд хIасул буван аьркиншиву. Бувсунни журналистътурал ихтиярду дуруччин хIарачат буллантIишиву ва журналистътурал захIматрал кьадру гьаз буваншиврул меценатътал, спонсортал кIункIу буллансса пикрилий ушиву. МахIаммад Ибрагьимов «Дагъусттаннал лайкь хьусса журналист» тIисса цIа цалчин ларсминнавассар, ва цIанин лайкь хьуссар гьашину. Ва ур лазгиял публицистикалул Рамил Микаиловлул цIанийсса премиялул цалчинма лауреатгу. ХIасан Алкьадарил цIанийсса культуралул ва просветительский центрданул хъунамагу.
Ва 2005 шинал дуклан увххун ур Дагъусттаннал педагогикалул университетрал дагъусттан филологиялул факультетрайн. 2011 шинал аспирантуралувун дуклан увххун ур, Аьзиз Алемлул творчество ахттар дуллалисса диссертация чирчуну дур. ДГУ-рал филологиялул факультетрал журналистикалул отделение къуртал бувну бур. Журналистикалуха зун айивхьуну ур 2009 шинал, «Голос Куруша» тIисса кказитрал жаваб дулайсса секретарьну. Вава даврий зий унува «Лезги газетрал» собкоррнугу зун ивкIун ур. 2017 шинал «Лезги газетрал» хъунама редакторну увчIуну ур. Ва ур «Рассвет вдохновения» луттирал (2009 ш.) автор, Куругли Ферзалиевлущал уртакьну итабавкьуну бур школарттансса лазгири мазрал пособияртту. Ниттил маз ва культура ядан буллалисса хIарачатрахлу 2012 шинал ва лайкь хьуну ур Дагъусттаннал халкьуннал шаэр Юсуп Хаппалаевлул цIанийсса Республикалул премиялунгу.
ДакIнийхтуну барча уллай, жугу умудрай буру, ванал хIарачатрайну миллатирттал прессалухсса къулагъас хъун хьунссар, ххуйчулиннайсса дахханашивуртту хьунссар тIий.
Дагъусттаннал Журналистътурал союзрал цIусса председатель увчIаврил хIакъиравусса цаппара пикрирду:
Аьбдуразакь Жамалуттинов, Дагъусттаннал информациялул ва печатьрал агентстволул хъунама:
– МахIаммад Ибрагьимов журналистътурал хъунаману увчIаву ванал цува каялувшиву дуллалисса изданиялий даву дюхъан дуваврин бивщусса кьиматри. Жагьилсса, бюхъу-бажар бусса каялувчи журналистътурал организациялул даву цIу дуккан дувансса, республикалул журналистътурал мурадру кьянкьану буручлансса ниятрай ур. Агентствогу ванал дуллалисса даврицIун кабакьу буллантIиссар, уртакьну, бавкьуну зунтIиссару.
Бурлият Токболатова, «Дагъусттаннал правда» кказитрал хъунама редактор:
– Ва, Аьрасатнал Журналистътурал союзралгу хъинчулий ккарксса, лайкьсса кандидатурар. МахIаммад ттун кIулли 2016 шиная шинай. Таний на печатьрал ва информациялул министрну зий буссияв, гьамин, та ппурттуву ивтссия МахIаммад лазгиял миллатрал кказитрал хъунаману. Цайнна дурсса вихшала цIакь дурну, жаваблувшинна кIулну зий ур, журналистъталгу ванал лагма лаганссар тIисса умуд бур.
Арсен Юсупов, «Дагъусттан» Этномедиахолдинграл хъунама:
– На ххарину ура Журналистътурал союзрал каялувчину гьамин миллатрал прессалул вакил увчIаврия, цувагу цалчинминнавух Дагъусттаннал лайкь хьусса журналистнал цIа ларсъсса. Ванал коллегахъащалсса ххуйсса арардугу дур, инсан хIисаврайгу, редактор хIисаврайгу ванал хIурмат бур, кказитрайсса даврил опытгу биялсса бур. Шавкьирай кказитрал даву гьаз дурсса инсан ур.
