Буттал кIанттул цIанийсса Хъун дяъви байбивхьуну 82 шин шаврин хасъсса акциялувух гьуртту хьунни оьрчIал лагерьдугу – школарттайсса ва шагьрурдал кьатIувсса. Вожатыйтурал оьрчIахь бувккунни «Хъунмасса дяъвилул мюрщисса вирттал» тIисса лекцияртту.
– Дяъвилул аьратталсса ппурттуву, хъуниминнацIун хъар дургьуну, Ххувшаву гъан дуллай, зий бивкIссар чIавасса захIматчиталгу. Дуклаки оьрчIру аьралий заводирттай зий бивкIссар, ляркъумур обороналул фондравун дуллай, фронтовиктуран гъилисса янна датIлай, занай бивкIссар. Ххувшавриву оьрчIал бутIагу буссар. Жунма хIакьину тай яхIлувсса оьрчIаягу, ппухълуннал гьунардаягу, чувшивриягу буслан аьркинни уттисса никирахь, ххувшаву цуксса ххирану дарцIуну дуссарив оьрчIангу кIулну бикIаншиврул, – увкунни Аьрасатнал «Знание» обществалул Дагъусттаннал филиалданул директор Элина Рашидовал.
