Гьашину Къизилюртуллал выпускниктураву ЕГЭ-лул яла лахъсса баллу лавсмурну бур жула лаккудуш, ва шагьрулул 1-мур гимназиялул дуклаки душ Карина Бариева. Литературалул экзамен ванил дуллуну дур 100 балланун, оьрус мазралмур 95 балланун. ХIасил, мусил медаль ласун наниминнавух ва бур цалчин.

Руслан ХIабибуллаев
Карина бувнугу, хъунма хьунугу бур Къизилюртлив Хъанардал шяраватусса Бариев Шамиллул ва Заирал кулпатраву. Ниттилмур хиял цила душ кIяла хялатраву агьалинал цIуллу-сагъшивруцIун бавхIусса хIакиннал пишараясса бунугу, Карина дакI дарцIуну най бур ДГУ-лул филологиялул факультетрайн. Вания ххаллилсса филолог хьунтIишиврийн щак бакъар душнихь дарс дирхьусса учительтурангу, архIал дуклай бивкIминнан ва нитти-буттангу. ТIайлабацIу баннав вин, Каринай! ДакIнийсса мурадгу щаллу хьуну, оьрмулуву гихунмай хьунабакьинтIисса шачIанттугу лахъансса!