Вай гьантрай Аьрасатнал хъуншагьрулия бувкIунни ххарисса хавар, жула лакрал ва Дагъусттаннал ххаллилсса вакил, Ибрагьимлул арс Сяъдуллагь Абакаров Аьрасатнал Элмурдал академиялул член-корреспондентну кьамул увну ур тIисса.
Медициналул элмурдал доктор, профессор, АьФ-лул лайкь хьусса хIакин, АьФ-лул ПаччахIлугърал премиялул лауреат Сяъдуллагь Абакаров увну ур 1953-ку шинал Арманинаву, ппу хIалтIилухун лавгун ивкIсса чIумал. Ванал ппу Ибрагьим Чараватусса ур, нину СахIибат дур ТтурчIиял шяраватусса. Хъуна хъанайгу, школалий дуклайгу ивкIун ур Хасаврай.
1975-кусса шинал Сяъдуллагьлул къуртал бувну бур Дагъусттаннал паччахIлугърал институт. 1979-ку шиная шийнай яхъанайгу, зийгу ур Москавлив. ЦIанасса чIумал ва зий ур Аьрасатнал Медициналул академиялучIасса стоматологиялул факультетрал деканну. Ванал кIунттила бувккун бур 500-ннийн бивсса элмийсса захIматру, 14 монография, 50-нния ливчусса дуккаврил пособияртту ва м.ц.
2021-ку шинал ванан дуллуссар «За заслуги перед Республикой Дагестан» тIисса орденгу.
Жуна цинявннанагу бусравсса лакрал арс, буттал кIанттулгу хъунасса патриот, «Илчи» кказитрал редакциялулгу хьхьичIунсса дус Сяъдуллагь дакIнийхтуну барчагу уллай, чIа тIий буру цIуллусса оьрму, цIу-цIусса тIайлабацIуртту ва ххуй-хъиншивуртту.
Жу вия мудангу пахрулий буссару.
Щалагу лакрал миллатрал, интеллигенциялул, дус-ихтивартурал цIания
«Илчилул» редакция
