Ноябрь зурул 22-нний ДР-лул ХIукуматрал Председатель Аьбдулмуслим Аьбдулмуслимовлул каялувшиндаралу хьунни АхIмадхан Султаннул цIанийсса МахIачкъалаллал аэропорт цIу буккан баву мурадрай дурну диркIсса кьутIи иширайну зузи даврил масъалартту ххал бигьлагьисса совещание.
Шиккува бусан, ДР-лул ХIукуматрал ва МахIачкъалаллал аэропортрал дянив хьхьичIара дурну диркIссар ва даврил ялувсса инвестициялул проектрал кьутIи.
Премьер-министрнал бусаврийн бувну, аэропорт цIу буккан буллалисса кIилчинмур ятIапIрал проект дузрайн дуккан даврин итадаркьуну дур 515 млн арцул. —
Аэропорт цIу буккан баву мурадрайсса проектрансса харжлугъ итадакьлакьиссар № 1704 АьФ-лул ХIукуматрал хIукмулийнусса АьФ-лул бюджетрал кредитирттахсса буржру чан баврийну салкьи хьусса арцуйну, – увкунни Аьбдулмуслим Аьбдулмуслимовлул.
Вице-премьер Руслан Аьлиевлул бувсунни Аьрасатнал Минэкономразвитиелул проектрацIунсса цаппара дахханашивуртту дуршиву.
МахIачкъалаллал аэропортрал хъунама директор Саэд Рамазановлул кIицI лавгунни аэропорт цIу буккан баврил ххуллий итадаркьусса арцух пикрилий бушиву 6 объектрал строительство дайдишин.
— Амма кIицI ларгсса давуртту дайдишин хьхьичI чара бакъа аьркинну бур аьрщарал дазурду ккаккан дан, – увкунни Саэд Рамазановлул.
Ихтилатирттах вичIидирхьуну махъ Аьбдулмуслим Аьбдулмуслимовлул ДР-лул Минимуществалийн, Минстройрайн ва Къарабудагъкантуллал администрациялийн тапшур бунни цIусса объектру бансса аьрщарал дазурду ккаккан дуван.
