1918 шинал Ккуллал шяраву сакин дурсса партъячейкалувун бувхру на, Даду ХIусайн, Исрапил, ПпилимутI Оьмари. Мура шинал Хъусрахьгу сакин дурна партъячейка. Мунил секретарьну ивтуна Алхасов Аьлил.
1921 шинал Хъусрахь школа тIивтIуссар. Учительтуран харжиран дулайва зуруй пут ва дачIи хъалул, 400 грамм тутундалул. ЧIал къавхьуну Хъусрахьсса школа лавкьуна, аьркинмунил дузал бан къабюхълай тIий.
1925 шинал Хъусращиял шяраву цIунилгу школа тIивтIуссар. Школалул заведующийну уссия Ккулатусса Аккуев Сулайман.
1930 шинал Хъусращиял шяраву комсомол ячейка сакин дурссар, мунил 1-ма секретарьнугу Кубачанов ХIабибуллагь увчIуссар.
1935 шинал Хъусращиял жямат бувхссар колхозравун. Колхозравун кьамул къабувссар кулакталну ккалли бувсса ва чIунил ихтиярду зерххусса инсантал.
1936 шинал январь зуруй на партиялува уккан увна, ккулакталну ккалли бувсса Шихамировхъал ва Бавасулаймановхъал кулпатирттахлу уклай ур тIий. Амма шяраву авадансса, чил захIмат ишла байсса инсантал бакъая. Исполкомрайн аьрза чивчуссия вай кулпатирттай дирхьусса дишалартту яла дичинсса ва ми кулакталшиврия лиххан бансса. Окружкомрал парткомиссиялул ттул аьрза кьамул къабувну, партиялува уккан аву цIакь дурну дия. На партиялува уккан уван бувсса хIукмулий чивчуну бия: «Щарсса дуккан дурну, цамур дурцуну, личIи хьусса щарссанин кумаг къабуллалавур тIий». Амма ттул оьрмулуву ца щарссагу, цавай оьрчIругур хьусса.
1936 шинал июль зуруй 3000 къурушран юргъачу машан лавсъссия. Лакрал райондалул прокурор Кьадиров Расуллул му барча бан кьяца буллуна. Яла, махъ, балчан Кьукниятусса ХIанзан нава машан лавсъсса багьлуй бавххуссия.
1937 шинал февральданул 17-нний ЧIяв совещаниялия укканнин чая кIили ва ххуржинтту дарцуну дия.
1937 шинал апрель зуруй Ккурунналувусса мащилий мурхьру бугьлай буссия. Ва даврил сиптачиталну бия МахIачкъалалиясса агроном Ильинский ва 1-мур ЦIувкIратусса Гьарун Бакриев.
1945 шинал майрал 8-нний радиолувух баян бувна немецнащалсса дяъви къуртал хьушиву.
1947 шинал ХIайдаров Аьбид парторгну авцIуссар.
Гихунмайгу буссар.
Имара Саидова
1948 июнь зурул 9-нний дуниял сукку хьуну, къатрал чIиртту буцари бувна.
1948 шинал июль зурул 11-нний Багъирчан хъатIи бувссар.
1948 шинал август зуруй Раджабов Щамххаллун хъатIи бувссар.
1949 шинал июль зурул 10-нний Хъусращиял Советрал хьхьичIунсса кIантту бувгьуну тIий, Райондалул исполкомрал председатель Исрапилов увкIна бахшишру дулун. Давдиев Аьлин 1500 къуруш, Иллаев АхIмадин – 700 къуруш, Бадавинан 300 къуруш, цаппара активрангу, миннава ттунгу 100 къуруш дуллуна.
1950 шинал июнь зурул 10-нний, ттула ссийн, ТIаибатлун, кIинничалт бувссар.
1954 шинал май зурул 12-нний Аминов Буниямин колхозрал председательну ивтссар.
1954 шинал август зурул 1-нний МахIачкъалалийн бакIлахъиялул высттавкалийн лавгссия.
1954 шинал ноябрь зурул 11-нний Ккуллал ХIасан армиялува къуллугъ бувну увкIна.
1955 шинал апрель зурул 9-нний ПянтIурхъал ХIапизат дуркIна Нарисат була учин.
Имара Саидова
1
