Уттигъанну Нальчикрай хьунни лаккудуш, Гьуйннал шяравасса художница ПатIимат Кьурбановал ва ярудуш, Хъунзахъатусса Ханум Оьмаровал «Аьзизсса улча» цIанилусса выставка тIитIлатIисса шадлугъ. Выставкалулсса бувну бур шагьру хьхьичIунмай баврил «Платформа» цIанилусса институтрал, Нальчик шагьрулул администрациялул кабакьаврийну.
Выставка тIиртIунни Къабардин-Балкьарнал Ттуршра шинал паркрал дязаннивсса Ттизаманнул искусствалул выставкарттал павильондалий. Ва бур ляличIисса музей. Ванийн «выставочное пространство» тIий бур, пюрундалул ккуркки къатрацIун вай махъругу ххишала бакъа бавкьуну чIалай бур.
Ва бур Ухссавнил Ккавкказуллал ва Аьрасатнал цаймигу регионнал художниктал ва тамашачитал хьунабакьлакьисса культуралул кюру. Ца выставкалун кIанай цамур тIитIавай, живописьрал кIану скульптуралул бугьавай, скульптурардал кIанайн суратру, суратирттан кIанай жагьилсса модельертурал дурсса давуртту дишавай, шивусса культуралул оьрму щиривкIуну най бур. Ва ххуллухьрив павильондалуву сайки зуруй ккаккиялун бивхьуну бур дагъусттаннал культуралия, багьу-бизулия, аьдатирттая бусласисса выставкалул экспозиция.
Выставка тIитIлатIисса шадлугърал бусравсса хъамаллуравух хьусса Гъумучатусса Сурхайханов Ибрагьим-Халил ур художник, скульптор, заргал, СССР-данул Художниктурал союзрал член, Къабардин-Балкьарнал Республикалул Художниктурал союзрал дуллалисса выставкалул проектирдал муданасса гьурттучи. «Вести КБР» ва Къабардин-Балкьарнал телевидениялул цаймигу выпускирдай, соцсетирдай хIадур дурсса ва выставкалиясса сюжетирттаву Ибрагьим-Халил кIицI лаглай ур дагъусттаннал художниктурал школалул ляличIишиву, щихачIав къалащаву, усттаршиву, ларайсса пишакаршиву.
ПатIиматлул ва выставкалий дирхьуну дур личIи-личIисса давуртту, амма вай циняв цачIун дурну дур авторнал цилла ватандалухсса ччаврил.
Ханумлул дур, «Ттул дакIнил къатта» тIисса, Дагъусттаннал халкьуннал шаэр Фазу Аьлиевал творчествалул гьавас бувтун щаллу дурсса графикалул давурттал серия.
Бадрижамал Аьлиева
