Лакрал райондалул бакIчинал хъиривчу Явсупи ХIамзаев хьунаавкьунни хасъсса аьралий операция нанисса кIанттава кутIасса чIумуй игьалаган увкIсса талаталащал. Хьунабакьаврий гьуртту хьунни Лакрал ва Ккуллал районнал аьралий комиссар ХIасан Масуев.

Аьбдурашидов Аьли Аьбдурашидлул арс аьралий бурж лахълай ивкIун ур 2007-ку шинайннин. Мичча увкьукун, чирчуну дур 205-чинсса мотострелковый бригадалуву къуллугъ буллансса контракт. Аьралий бурж лахълай ивкIун ур Чачаннаву.
Аьралий иширттал ветеран зана хьуну ур махъунай Буденовскалийн, гичча тIайла увккун ур хасъсса аьралий оперция нанисса кIанттайн. Аьрасатнал Федерациялул Президентнал Указрайн бувну, лайкь хьуну ур Жуковлул ва «За доблестную службу» тIисса медальлан. Контракт къуртал шайхту, цIусса чирчуну, хIакьинугу талай усса ур Херсоннал областьрай.
Хьунабакьаврий ихтилат бия хасъсса аьралий операциялий талатиминнал кулпатирттан ккаккан бувсса кумаграя, ичIаллил шартIру къулай даврия ва цаймигу агьамсса масъаларттая.
Аьли Аьбдурашидовлулгу бувсунни аьралий къуллугърая. Барчаллагь увкунни райондалул бакIчинахь ва агьалинахь хасъсса аьралий операциялий талатисса ватанлувтуран гуманитар кумаг тIайла буклай бушиврухлу ва кулпатирттах дуллалисса аякьалухлу.

Зулайхат Тахакьаева