ГьунчIукьатIрал Зиябуттиннул арс ХIажимирзаев Асадуллагь увну ур 1934 шинал ноябрь зурул дязаннаву. Гьашину ноябрь зуруй Асадуллагь увну 85 шин бартлагаврил юбилей хъанай дур.
Асадуллагьлул щала оьрму учирчангу шоферну, машиналул рульданух лавгунни. Гъумук 9-мур классраву дуклакисса чIумал ванан кIулну бия Ккуллал ва Лакрал районнайсса цинявппа машинарттал номерду, чIявуми шофертурал цIардугу. 1954 шинал 10-мур классрава армиялийн увцусса чIумал, тиккугу Асадуллагь, шофернал пишагу лавхьхьуну, машиналий зий ия цала бурж лахъанцIа.
Вана укун, оьрмулул 80 шин хьуннин, 60 шин ххишалагу дурну дур Асадуллагьлул машиналий зий. Ванал захIматрал ххуллу ччарчан Дагъусттаннал зунттал районнайх, ччарча Памир зунттул районнайх занай, ччарчангу кьаних, шагьрурдай зий-захIмат буллай бивтун бур.
Махъсса даврия (Хлебозаводрая) пенсиялийн нанисса чIумал, Асадуллагьлун ва заводрал коллективрал, ванал дурсса ххуйсса даврихлу, цува зий ивкIсса машинагу пишкаш бувунни. Асадуллагьлул цала даву щилчIав аьй къарищунну, лажин кIялану биттур дувайва. Мунияту ванал хIурматгу даврил хъуниминначIа ва архIал зузиминначIа лавайсса бия.
Асадуллагьлул цала аьпалухьхьун лавгсса кулпат Мирзанатлущал арс ва душ чивун буккан бувунни. Мигу цала къушай, цала нитти-буттал цивппа хъуни бувсса кунма, цала оьрчIру гьаз буллай, зий бур.
Жул хъунмасса хIурмат бусса, жул ххирасса шяравучу Асадуллагь! ГьунчIукьатIрал ккурангу, махъсса цинявппа гьунчIукьатIигу дакIнихтуну ина барча уллай буру оьрмулул 85 шинал юбилейращал. Вихьхьун 90 шинал юбилейгу хьунадакьинсса каши дулуннав Аллагьнал. Ина вила оьрчIал оьрчIал ххари уллай, оьрмулул уччиннин итаннав.
Жу цинявппагу, ина барча уллай, вин цIуллушиву чIа тIий буру.
ГьунчIукьатIрал ккуран
