
Март зурул 25-нний ЦIуссалакрал райондалул администрациялий райондалул бакIчинал хъиривчу Султан ХIамзатовлул каялувшиннаралу хьунни Ххувшаврил байрандалийнсса хIадуршинна дайсса оргкомитетрал цалчинсса заседание.
Ванил гьурттучитурал ххал бивгьунни гьайкаллу ва паркру бакьин баврил, идарарттал лагма-ялттусса кIанттурду марцI баврил, байрандалул гьантрай полициялул зузалтрал кумаграцIух мюхчаншиву дузал даврил, байрандалул лагрулий дантIисса мероприятиярттал план сакин даврил ва ми мероприятияртту СМИ-рдай аьч даврил масъалартту.
Пландалийн бувну, ЦIуссалакрал райондалий Буттал кIанттул цIанийсса Хъунмасса дяъвилий жанну дуллуминнал гьайкалдануцI дишинтIиссар тIутIив. Мукунна хьунтIиссар «Ххувшаврил ттугъ», «Ххувшаврил чирахъ», «ДакIнил гъилишиву», «БивкIу бакъасса полк», «Георгиевская лента», «Ххувшаврил чIавахьултту», «Фронтраясса чагъарду» акциярду. ХьунтIиссар Ххувшаврил Ттугълищалсса автопробег, школардай дишинтIиссар Чувшиврул дарсру, бантIиссар спортрал бяст-ччаллу.
Султан ХIамзатовлул кIицI лавгунни, Ххувшаву ларсун 80 шин шаву лахъа-хъунну кIицI лагаврийну, жува билаятрал цIанихсса тарих дакIнин бутлатишиву, ва дяъвилул щавщи бивсса цинявппагу жула халкь лагма лаган бансса ишну хъанахъишиву.
Байрандалул мероприятиярттай, акциярдай, флешмобирттай чялишну гьуртту хьунтIиссар Ххувшаврил волонтертал, активистътал, «Цалчинминнал суккушиннарал» члентал, жагьилтал ва дуклаки оьрчIру.
Заседаниялул хIасиллу дуллай, Султан ХIамзатовлул кIицI лавгунни байрандалийн хIадуршинна даврил ва му тIайла дуккаврил масъаларттаву цинярдагу ведомствартту ва Оргкомитетрал члентал хIала-гьурттуну, цачIу зун аьркиншиву.