Дагъусттаннай июльданул 6-8-нний ларчIун диркIсса чявхъа- гъараллал лавсун бивкIсса ламурду ва ххуллурду бакьин буллай бур.

ТIабиаьт оь дикIаврил зарал биян бувну бия 15 муниципалитетрайсса 41 участокрайн ва ламуйн. Цалчинми гьантрайва машинарттал ххуллурду лавкьуну бия 101 шяравун.

Июльданул 12-нний бакьин бувну бур 19 участокрайсса ххуллурду, мунийну цIунилгу дузал дурну дур 89 шяраваллищалсса дахIаву.
ЧIумуйнусса дахIаву дузал дурну дур Гъуниннал райондалийсса 5 шяраваллищал, ЧIарадиял райондалийсса 18 шяраваллищал ва ТIиларатIиял райондалийсса 7 шяраваллищал.
Рутуллал райондалий дузал бувну бур Игьрачиял, ЧIатIлухъиял ва Дюкъуллал шяравунсса ххуллу, кIикку зий ур 93 ххуллул зузала ва 33 техника.
Щин дарцIусса ва лахIунттив дурцсса кIанттурдайми ххуллурду бакьин бантIий бур кIикку давуртту дуллансса тагьар сакин хьувкун.

ХI. Аьдилов