Мудангу дакIнийхтуну ххари шара Дагъусттаннайгу, Дагъусттаннал кьатIувгу хьхьичIунсса, миллатрал цIа бюхттул дуллалисса лакрая.

Мукунминнавасса бур Москавлив ялапар хъанахъисса ва зузисса лавайсса категориялул хIакин-невролог, остеопатиялул доктор, Лазерданул хирургиялул клиникалул хъунмур хIакин Башанаева ТIутIубава Кьурбаннул душ.
Уттигъанну ванин ПаччахI­лугърал Думалул депутат Султан Хамзаевлул чулухасса Барчаллагьрал чагъар буллунни. ТIутIубавая хьхьичIвагу чивчуссия «Илчи» кказитрай, ва чIивисса оьрмулуву пишалул ххуллий ларайсса ккаккияртту чIалачIи дурсса хIакин бур.
– Наградарттайн аьдат хьуну бунугу, ваницIа ляличIину ххари хьура. Бюхъай, хар-хавар бакъа дуркIун тIий бикIан. Султан Хамзаев жагьилминнан ххуллу тIитIин ччисса, миннавусса бюхъу-гьунар хIисав шайсса инсан ур. Пишалул ххуллий хьхьичIунмай хьун ччисса, хIарачат буллалисса хIакинтурацIун кабакьлакьисса ур. Ттунгу бахтти хьунни ванащал ца командалуву зунсса. Султан Хамзаевлул каялувшиндаралу на буссияв Дагъусттаннай хасъсса аьралий операциялия зана хьусса аьралитурал реабилитация дуллай. Ца-цаннаща цIуницIа щяикIлан, цавайннащагу оьрчI карав буцлан бювхъунни. Ва хъунмасса ишри. ТIааьнну бия ва наградагу нава кIулшивурттал гьану бивзсса школалий дулаву. Ххуллу байбишайсса жува гьану бивзсса кIанттаяр.
На чIявуну тикрал буллан бикIара: остеопатия – му цIуцIаву дакъар. Му тархъаншивур. Сукку тIутIавур. СсихI бигьлагьавур. Асар хъанахъавур. Оьрму бутлатавур. Ттула захIмат хIисав хъанан бивкIукун, мунин лайкьсса кьимат бишлан бивкIукун, ттун хъиннува бувчIлан бикIай нава ттула кIанай бушиву.
Мудангу хIадурссара ттущава шайсса кумаг гьарнан бан, – тIий чичлай бур ТIутIубава.