АрвахIкьини Гъумук лахъа-хъунсса даражалий хьунни паччахIлугърал ишккакку, 1942-1948 шиннардий Лакрал райкомрал хъунаману зий ивкIсса Мусаев АхIмад Сулайманнул арснал аьпа абад буллалисса ула тIитIлатIисса шадлугъ.

Мероприятиялул бусравсса хъамаллуравух бия: «Дагестан» ВГТРК-лул директорнал хъиривчу Ссалам Хавчаев, ДР-лул Жяматийсса палаталул хъунаманал хъиривчу Ссапарбаг Аьбдуллаев, «Илчи» кказитрал хъунама редакторнал хъиривчу, Дагъусттаннал халкьуннал шаэр Руслан Башаев, жяматийсса ишкка­ккулт Шалласу Шалласуев, Султан ЦIаххаев, Кьукуннал шяраваллил вакилтал, АхIмад Мусаевлул гъанчу.

Ула тIитIинсса сиптачи хьуну ур АхIмад Мусаевлул кIилчинма арс Эрнс. Ванал сипталийну ва кашилуцIух ттигъанну Гъумук абад бувссар райондалий цалчинсса роддом тIивтIусса Анастасия Пыпал аьпа. Буттал кIанттухсса ччаву буттая ирсирай дирну дур ванангу. Ватандалия архну хъунмур оьрму лавгнугу, мархрая увцун акъар.

 Увну ур АхIмад Мусаев Кьукуннал шяраву 1912 шинал. Дуклай ивкIун ур Ставрополлай, тихун хIалтIилухун лагайсса ивкIун ур ванал ппу. 40-ку шиннардил дайдихьулий АхIмад увкIун ур Лакрал райондалийн, прокурорну зун. Шин чIарах дукканнин байбивхьуну бур Буттал кIанттул цIанийсса Хъунмасса дяъви. Ва шин Дагъусттаннал хозяйстварттан хъинну захIматсса хьуну дур. БакI къабувккун бур Лакрал райондалул ризкьилул шанма бутIул ца. Ва захIматсса тагьарданий райондалий каялувшиву дуллан багьну бур жагьилсса оьрмулий АхIмад Мусаевлун.

Гьамин, тай шиннардий чирчуну дур тарихраву Лакрал райондалул виричушиврул цIа – райондалул агьали хьуну бур ватандалул цIаний жард къакуну захIмат буллангу, литIунгу хIадурсса цашиврул лишанну.
Колхозниктурал цала зузи кьинирдал хIакь чичлай, ацIния мукьва миллион къуруширттал бавтIун, тIайла бувккун бур танкардал колонна дан. Обороналун кумагран тIайла бувксса ва захIматрахлу район шамилла лайкь хьуну дур СССР-данул ПаччахIлугърал Обороналул комитетрал Занази ЯтIул Ттугълин ва СССР-данул Совнаркомрал Занази ЯтIул Ттугълин. КIивагу ттугъ абадлий ливчIссар райондалучIа, хIакьину ми хIурматрай ябуллай буссар Совет Союзрал Виричу Муса Маннаровлул цIанийсса музейраву.
Дагъусттаннай цамур район хьуну дакъар укун бюхттулсса кьиматран лайкь хьунсса. Щала Союзрайгума дурагу шанна район хьуну дур, ца –Лакрал, кIира – Къиримнал, Керченский ва Джанкойский.
1942 шиная 1945 шинайннин райондалул лухIи ризкьилул аьдад ххи хьуну дур сайки кIилийну, яттилсса кIира ва дачIиннул, дучралсса – ца ва дачIиннул. Дяъвилия махъсса шиннардийгу АхIмад Мусаевлул каялувшиндарай хьхьичIуннай хьуну дур шяраваллил хозяйство.

Мероприятие дайдихьлай, Лакрал райондалул бакIчи Зураб Куччаевлул кIицI лавгунни АхIмад Мусаевлул даражалул инсантурал аьпа абад баврийну жува ябуллай бушиву тарихрал хIакьмур ва мунил эбратрай тарбия дуллай бушиву ялун нанисса ник.
«ХIакьину жува биттур буллай буру жула билаятран яла кьянатсса ва жапасса шиннардий захIматшивурттал хьхьичI жард къакуну, цала миллат буруччаврил цIаний захIмат бивхьусса инсаннал аьпалул хьхьичIсса бурж.

АхIмад Мусаев эбратну хьуссар цала захIматрайн дакI тIайлашиврул, жаваблувшиндарал ва чувшиврул ганал хIукмурду ва давуртту хьуссар райондалунсса ттарцIну, ванал захIматрал ирс тIурча – жунмасса эбратну. Ва аьпалул ула тIитIавугу, анжагъ, ххаралунсса иш бакъарча, тарихрал хьхьичIсса жула буржри, – увкунни ванал.
Муния махъ, аьпалул улттуя пардав лирккунни Зураб Куччаевлул, арснал Эрнслул, АхIмад Мусаевлул душнил Жаннал.
Мажлисрай ихтилатру бунни ялагу Ссалам Хавчаевлул, Руслан Башаевлул, Ссапарбаг Аьбдуллаевлул, Шалласу Шалласуевлул.