Жува байкъалитIавай буслан бикIару Дагъусттаннал агьалинал ца язисса хъус хьхьири бушиву ва гъинтнил чIун дучIаннин ялугьлан бикIару хьхьирил щиная неъмат ласланшиврул. Амма хьхьиривун бучIай сезон дайдирхьуннихха, республикалул Роспотребнадзорданул баян бувай хьхьиривун бучIаврийн къадагъа душиву. Гьаннайсса, царагу пляжрай къабучIишиву.

Хьхьирил щинал тагьар ххал диргьусса лабораториялул санитар тIалавшиндарал ккаккан дурсса кьаралдануяр шамийла-мукьийла ххишалану чапалну душиву ккаккан дурнутIий, сававгу – канализацияртту хьхьиривун най душиву.

МахIачкъалалив, Хасавюртлив, Къизилюртлив, Къизлардай ва Южно- Сухокумскалий канализация марцI дувай сооруженияртту гьарза- гьарта дурну, дакьин дуван багьлай бунутIий ва Дарбантлив, Буйнакскалий, Избербашрай, Даг-Огнилий мукунсса сооруженияртту дурагу дакъатIий.
Ялув кIицI лавгсса Управлениялул бусаврийн бувну, хьхьирил щин санитар тIалавшиндарал кьаралданийсса дакъашиврия республикалул прокуратуралийнгу баян бувшиву, мигу хъирив лаяншиврул.

Мяйжанссар, бугълия, кIиришиврия хьусса агьали, бярчру ххютулун кунма, хьхьирийн ила бичай, туристътураяр махъун къабагьлай. Къадагъар­ттайнгу ччан щуну, хьхьирил щатIавун буххай. Гьай-гьай, бирияй лахъай азардал, вирусирттал къатIухьхьунгу.
Баян буннихха хIакинтурал цимилагу, хаснува мюрщулт инжит шаврил дайдихьу хьхьиривун бучIаврия най душиву. Гьаннайсса, шиная шинайн баяйсса ва баххана къахъанахъисса хIуччарду ва къадагъартту. Вава къатIух вава бюрх. Роспотребнадзор ва прокуратура хъирив лаяннин хьхьирил сезонгу къуртал хьунтIиссар, пух-пусурданул, ччюрклил канализациярттал тагьаргу вара даражалий личIантIиссар. Туну, хьхьирийн хьхьирил щинай тамаша буллан зананнув?
Жунма хьхьири нясив бувссагу так тамаша буллан бакъархха. Хьхьирил марцIсса щиная неъмат ласлансса тамахI къакьукьинну ялунчIиннин ягу тулунчIиннин, ягу…

ПатIимат Рамазанова