Марокколлал 24 шинавусса опорный полузащитник Магьди Мубарак ижаралул ихтиярданий уклантIий ур МахIачкъалаллал «Динамолухлу» тIуркIурдал ахирданийннин. Муния бувсунни клубрал Телеграм-каналданул.
Футболист уклай ур Аьрабусттаннал ЦачIундур Эмиратирттал «Аль –Аьйн» клубраву. Ва футболист ижаралий уцаврил хIакъиравусса рязишиндарал кьутIилий ккаккан бувну бур МахIачкъалаллал «Динамолул» га багьлух ласун (выкупить) бюхъайшивугу.
«Динамолувун» учIаннин Магьди ца-ца сезондалий уклай ивкIун ур Марокколлал клубирттахлу, бакIрай «Радже Касабланка» командалухлу, яла – «Видад» клубрахлу. Ванихлу уклай унува гъинттул ва гьуртту хьуну ур Клубирттал дунияллул чемпионатрал шанма тIуркIулуву.
Магьди Мубарак ур Марокколлал чемпион ва Марокколлал Кубок лавсма. Ва увцуну ивкIссар билаятрал цачIундур командалувун, мунихлу уклай ивкIссар 2021 шинал Африканал Кубокрай.
