Контракт къуртал хьуну, СВО-лия зана хьуну махъ Жамалуттин хьхьичI ххуттай бавцIусса жула аьралитуран гуманитар кумаг лавсун занай ­уссар. Шиккува кIицI лаган, цIана хьхьичI ххуттайн гъан хьун бигьану бакъар. Хасъсса аьралий операциялул гьур­ттучи унугу, аьралий журналистнал удостоверение бунугу, Жамалуттиннунгу ва ишираву захIматшивуртту хьунадаркьуну дур. Амма бажар бусса жагьилнал лявкъунни цахва ялугьлагьисса аьралитурачIансса ххуллу. Редакциялийсса хьунабакьаврий жу икьрал дурссия утти аьрххилий нанисса чIумал вана­хьхьун аьралитуран «Илчи» кказитрал коллективрал чулухасса ссайгъатругу, кказитрал цаппара номердугу тIайла бу­ккан.
Жамалуттиннул цалва мас­лихIатрайн бувну, жу ласарду нахIува-нахIусса аьрайнгьавккури цIанихсса «Магнолия» кафелува, жула ГулханумлучIату. Бишарду миннучIа «Аленка» шоколадирттал къуршивгу, икьрал дурсса куццуй, «Илчи» кказитругу. Жула пикри бусайхту, ка кIидархIунмасса Гулханумлул цила чулухассагу ссайгъат бишинна увкунни. Ххишалдаран, миннул хъирив бувкIсса Жамалуттин ва жугу ххуйну хъамалу бунну.
ЦIунилва-цIунил махIаттал бара Дагъусттаннал халкьуннал чумартшиврул, дугъришиврул, цIими бушиврул. Жу аьрайн­сса гуманитар кумаг хIадур буллай бур тIий бавну, Москавлия оьвкунни муданма аьрайн кумаг тIайла буклакисса, ччя-ччяни щавурду дирну госпитальлайн багьсса аьралитурачIан биллалисса Ххадижат ЦIаххаевал. Цила чулухагу, ссийл оьрчI Сагидлул чулухагу 10 кг аьрайнгьавккурттал ххи дунни. Му ппурттуву цила мурадирай кафелувун бувкIсса Избербашлиясса Зернишан Ибрагьимовал ва Сулакьраясса Маликатлулгу, жунгу ччива гьан бан куну, цала чулухасса къуршив ххи бунни. Вана укун, «Илчилул» сипта барачат хьуну, редакциялул коллективрал ссайгъатрацIун цайминналссагу ххи хьуну, тIайла увкссар жу аьрххилий Жамалуттин. Ссайгъатру гьан бувминнан цинявннан цадакьану бацIаннав.
Хъунма хIал къавхьуну Жа­малуттиннуя дуркIунни аьра­литурачIан сагъ-саламатну ивсса, хьхьичI ххуттай бавцIусса лаккуоьрчIал «Илчилул» ттугъ бувгьуну рирщусса суратру ва барчаллагьрал махъру.
Андриана Аьбдуллаева