Жула учайссар: «Адаминал цала миналун къаттагу бувну, оьрчIругу хъуни бувну, дуккингу бувну, яла дунияллулгу буварча – ва ххаллилсса кулпатрал заллу ур, цанмагу, оьрчIангу лайкьсса оьрму щаллу бунни», – куну.
Укун исватну цала чувшиврул бигаргу лавхъун, мунияр ххюлийну ххишаласса хъиншивурттугу дурссар цала мачча-гъаннангу, жяматрангу, дустурангу ЧIурттащатусса Магьдиев Аьлил Магьдиевичлул.
Вай гьантрай Аьлил ниттил увну 100 шин хъанай дур.
Увссар Аьлил 1924 шинал мартрал 12-нний. Гъумук 7 классгу къуртал бувну, дуклан увхссар Буйнакскаллал финансирттал техникумравун, ва къуртал байхту зун ивк1ссар Гъумук бухгалтерну.
Кулпатращал Хасаврайн ивзун махъ, шагьрулул Межрайбазалий цала пишалий зий уссия. Зий унува дуклан увхссар Москавуллал Финансирттал академиялувун, къуртал бувссар ЯтIул дипломрай.
Хъинну зат кIулсса, итххявхсса специалист хIисаврай Аьлил зун тIалав увссар Дагпотребсоюзрал хъунама бухгалтерну.
Цала оьрмулул хъунмур бутIа Аьлиллул бувтссар Дагпотребсоюзрай зий, яла, пенсиялийн увккукун, зун ивкIссар Промышленностьрал министерствалий ревизиярттал управлениялул хъунаману.
Ххуйсса давурттай зий унугу, Аьлил уссия дакI хъун дакъасса, ас-намус бусса, хъунанал хIурмат бусса, чIивинал урват бусса ххаллилсса зунттал чув.
Аьлил кIулнал ваная ххуймур, хъинмур бакъа къаучинтIиссар. Ванал биялсса кумаг бувссар цала даврихчIийнгу, кIулшивурттайнугу, шяравасса дуккавриву итххявхсса жагьилтал дуклан бухлахийнигу, давурттайн кьамул буллалийнигу, цанма кIулсса хIакинтурайхчIин къашайнал-шайнал чIаравгу авцIуссар.
Аьлиллул бувсса хъинбалартту щинчIав хъамакъабивтссар, сагъний хъинну бусраврай, хIурматрай уссия шяраваллилгу, шагьрурдайссагу жяматрал дянив, ахиратрал хьуну махъ хъинчулий дакIнийн утайссар цинявннал.
Хъиншиврущал архIал Аьлил уссия яхIлувгу. ЧIярусса дардру дурхIуссар, амма цала дакIнил къумашиву кIул къадайва, гьарцагу жяматрал иширттавух хIаласса ия.
Аьлиллул буссия ххюва оьрчI. Ми циняв, лавайсса даражалул кIулшивурттугу ларсун, зий буссия ххуйсса давурттай. Арс Жамалуттин – медициналул элмурдал доктор (аьпа бивухъул, Аьлиллул шамагу арс жагьилну бунува ахиратрал хьуссар), душ Саидат – медициналул элмурдал кандидат, Светланагу цила пишалий зий бур.
Аьлиллущал гъанну кIул хьуссара на «Илчи» кказитрай зузисса шиннардий, ва ия «Илчилул» хьхьичIунсса дус, гьарца шинал кказитгу чичайва, ванал чирчусса чIярусса макьалартту ва шеърирду буккайссия гьарца номерданий тIиссакссагу.
Ванал аькьлу-кIулшилий, гъалгъалул нахIушиврий, пасихIшиврий хIайранну бикIайва кказитрал зузалт. Аьлиллул хIурмат ттучIава хъинну лавайссия, мунин лайкьссагу ия.
Аьлил Магьдиевичлул итабавкьуссар лакку мазрайсса 2 жуж: «ЧIурттащиял лачIунбуккулт», «ЧIурттащиял шяраваллил тарих». Вай луттирдайну акъассагу, цала дурсса ххуйсса давурттайнугу Аьлил мудангу дакIний личIантIиссар цала унангу, щарнил жяматрангу.
ИвкIуссар Аьлил Магьдинал арс 2013 шинал июль зурул 27-нний.
Аьлиллул бувтссар хъинну бусравсса, дакI къумасса оьрму. Алжаннул ххари аннав, хIатI гьартасса хьуннав.
Аьт1икат ХасмахIаммадова
