[dropcap]Н[/dropcap]оябрь зурул 7-нний Къизлар шагьрулийсса М.В. Ломоносовлул цIанийсса 1-мур гимназиялий хьунни ингилис мазрал учительтурал пишакаршиврул усттаршиву ккаккан дуллалисса фестиваль.
Мунил сакиншинначитал хьунни ДР-лул КIулшивуртту дулаврил ва элмулул министерство ва Къизлар шагьрулул кIулшивуртту дулаврил отдел.
Имара Саидова
Фестивальданий гьуртту хьунни республикалул шагьрурдаясса ва районнаясса ингилис, паланг ва немец мазурдил дарсирдал 150-нния ливчусса учительтал.
ДР-лул КIулшивуртту дулаврил министерствалул тIалавшиннарайн бувну, фестивальданийн оьвкуну бия Къазаннал федерал университетрал, Пятигорскаллал паччахIлугърал университетрал, Дагъусттаннал паччахIлугърал университетрал ва цаймигу хьхьичIунсса ВУЗ-ирдал педагогтурайн. ЦIуссалакрал райондалул чулуха фестивальданий гьуртту хьунни Гьамиящиял школалул ингилис мазрал учительница Бича Багъданова.
Фестивальданул бусравсса хъамаллуравух бия «Русское слово» басмаханалул вакил Эльвира Масликова.
Шадлугърал даражалий ингилис мазрай фестиваль дайдирхьуна Ломоносовлул цIанийсса гимназиялул педагогтурал.
Хъирив педагогтурал ккаккан бунни, учительтуран ингилис мазрал дарсру дихьлахьини хьунадакьлакьисса захIматшивурттан хас бувсса, мастер-классру. Муния махъ ккавккунни мюнпатсса маслихIатру.
Хъирив Эльвира Масликовал презентация дунни цала басмаханалий итабавкьусса педагогтурансса ингилис мазрал учебникирттал. Фестиваль хьунни лавайсса даражалий ва педагогтуран хъунмасса мюнпат буну.
Фестивальданул хIасиллу дуллай, Республикалул КIулшивуртту дулаврил министерствалул вакил Лайла Арсланбаговал мастер-классру ккаккан бувсса учительтуран дуллунни хасъсса бахшишру. Ахирданий цинявппагу гьурттучитурал ва бусравсса хъамаллурал экскурсия бунни П. И. Багратионнул цIанийсса Къизлардал музейравух.
