Мартрал 7-нний МахIачкъалалив, Оьруснал театрданул хъунмур залдануву, хьунни щаллагу дунияллий кIицI лагайсса Хъаннил байрандалун хасъсса концерт. Ванийн нанисса хъаннин, душвавран фойераву дуллай бия тIутIив.
Ва мажлисрайн оьвкуну бия цалла-цалла давурттай хьхьичIуннайшивуртту ккаккан дурсса, чIявусса оьрчIру бувсса ва хъуни бувсса хъаннийн, хасъсса аьралий операциялул гьурттучитурал ниттихъайн, хъаннийн, душваврайн. Мажлис бачин бувну ия Дагъусттан Республикалул искусствардал лайкь хьусса ишккакку Карен Мкртычан.
Концерт дайдишин хьхьичI Дагъусттан Республикалул ХIукуматрал председатель Аьбдулмуслим Аьбдулмуслимовлул региондалул бакIчи Сергей Меликовлул цIания ва ХIукуматравусса цинявппагу арамтурал чулуха барча кунни хъаннихь ялун нанисса байран. Цалва ихтилатраву ванал чIурчIав дунни ттизаманнул хъаннил республикалул социал-экономикалул бущи анавар бавриву, билаятрал бакIчинал жулва хьхьичI бивхьусса личIи-личIисса масъалартту щаллу бавриву бихьлахьисса захIматрай, Буттал кIанттул цIанийсса Хъун дяъвилул шиннардий совет хъаннил дуллай бивкIсса чувшивурттай, хIакьинугу, СВО-лул иширттацIун кабакьаву мурадрай, хъаннил гьарца кьини дуллалимуний.
Гихунмай сахIналийн бувккуна Дагъусттаннал паччахIлугърал опералул ва балетрал театрданул солистътал, цIа дурксса балайчитал ва коллективру. Хъаннин бахшишрансса цалва композициялущал сахIналийн мукунма бувккуна Росгвардиялул оператив назначениялул личIисса 102-мур бригадалул аьралий оркестр (каялувчи Илияс Бактемиров).
Хъаннил байрандалун хасъсса шадлугърайсса батIаву сакин дурну дия Дагъусттан Республикалул Культуралул министерствалул ва «Дагестан-концерт» ГБУ-лул.
Бадрижамал Аьлиева
