Вай гьантрай МахIачкъалалив «Россия-моя история» паркраву лавайсса даражалий хьунни дунияллул халкьуннал дянивсса дазул кьатIув ялапар хъанахъисса хъаннил форумрал пленарное заседание. Форум хас бувну бия Буттал кIанттул цIанийсса Хъунмасса дяъвилий Ххувшаву ларсун 80 шин шаврин ва Ватан дуруччуйл шинан.
Шикку гьуртту хьун бувкIун бия паччахIлугърал органнал, элмийсса интеллигенциялул, жяматийсса ва диндалул организациярттал, Дагъусттаннайсса личIи-личIисса хъаннил ккураннал вакилтал ва 17 чил билаятрай ялапар хъанахъисса 50-ннийн бивсса дагъусттан душру. Вайннавух бия Беларусьнава, Азирбижаннава, Къазахъисттанная, Къиргъизнава, УзбакIнава, Таджикнава, Сербиянава, Гуржиянава, Грециянава, Турциянава, Иракьнава, ФРГ-нава, Франциянава, Великобританиянава. США-нава, Чехиянава, Эмиратирттая ва м.ц. хIукуматирттая бувкIсса. Шиккун мукунма оьвкуну бия хасъсса аьралий операциялул гьурттучитурал ниттихъайн, хъаннийн, ссурваврайн.
Заседание дайдирхьунни Аьрасатнал ва Дагъусттаннал гимнрайну.
Хъирив Дагъусттаннал бакIчи Сергей Меликовлул ва цала цIанияту хъамалгу, гьурттучиталгу барча бувну, ихтилат бунни Дагъусттаннал миллатрал политикалул ва диннал иширттал министрнан кIанайсса Тамерлан АбумутIалимовлул.
– Хъаннил форум ххувшаврил юбилейрайн тIайла дацIаврилгу цила лишан духьунссар. Цанчирча Буттал кIанттул цIанийсса Хъунмасса дяъвилий Ххувшаву ласун хъуннасса хъар хъаннилгу лархъссар. Ми талай бивкIссар дяъвилул майданнив, партизантурал кьюкьраву, захIмат буллай бивкIссар къинттуллух. Та дяъвилий 150 азаруннийн бивсса хъами лайкь хьуссар личIи-личIисса орденнан ва медальлан. УрцIалуннин дуллуссар Совет Союзрал Виричунал цIа.
МяйцIалла шинал хьхьичI кунма, хIакьинугу жула душру нигьачIаву дусса шартIирдай кумаг буллай бур хасъсса аьралий операциялий хьхьичI ххуттай бавцIусса жула аьралийтуран. ХIакьинусса кьини 40 азарунния ливчусса хъами бур хасъсса аьралий операциялий. Дакъар Дагъусттаннай царагу сфера хъами къазузисса. Чув, ци пишалий зий бухьурчагу, вай жаваблувну, дакI марцIну бартбигьлай бур цала буржру. Цала пишалий ва жяматийсса давурттаха зузаврицIун, вайннал лавайсса даражалий бартбигьлай бур ичIаллил бигардугу, – увкунни Тамерлан АбутIалимовлул хъаннин лавайсса кьимат бишлай.
Кулпатраву, жяматраву яхI-къириятрал, ас-намусрал кьанунну дуруччавриву, дунияллий дакьаву ва аслахIшиву дуруччавриву, халкьуннал дянивсса дусшиву цIакь давриву хъаннил бияла хъунмасса бушиврия, хъами агьамсса масъалартту щаллу баврил иширттавун кIункIу буллан аьркиншиврия, миннал ихтиярду гьарица чулуха дуруччаврих ххишаласса къулагъас даврия ихтилатру бунни Аьрасатнал халкьуннал къатлул директор, Аьрасатнал президентначIасса советрал член Анна Полежаевал, Дагъусттаннал Халкьуннал Мажлисрал депутат Елена Ельниковал. Аьрасатнал Чил билаятирттал иширттал министерствалул МахIачкъалаливсса вакил Марат ХIусмановлул, Дагъусттаннал бакIчинал маслихIатчи Энрик Муслимовлул, Дагъусттаннал Хъаннил советрал председатель Интизар Мамутаевал, Дагъусттаннал бакIчинал жяматийсса кумагчи Людмила Авшалумовал.
Чил билаятирттай цала дуллалимуния бувсунни «Берекет-Ф» ООО-лул генеральный директор, Къазахъисттаннал Мангистауский областьрал Хъаннил гужирдал альянсрал председатель Зарета Фаталиевал, Лондоннайсса «Знание» тIисса оьрус школалул вакил Ума Кьадировал, Азирбижаннавусса Аьрасатнал посольствалул 3-мур секретарь Мария Алимова-Нефедовал ва м.ц.
Интизар Мамутаевал дуллунни Дагъусттаннал Хъаннил союзрал чулухасса наградартту ва бахшиш дунни авурсса лачакру чил билаятирттая бувкIсса жула душвавран. Миннавух бия жула цIанихсса шаэр, таржумачи, литературалул критик Миясат Муслимовал душ Аделиягу.
Ихтилатирттал лях-карах личIи-личIисса ансамбльлал ккаккан дунни къавтIавуртту, увкунни балайрду.
Фойелуву тIивтIуну бия Дагъусттаннал халкьуннал дукрарду ва канил дурсса кьай-кьуй дирхьусса майданну.
Андриана Аьбдуллаева
