МахIачкъалалив, Каспий хьхьирил зуманив тIивтIунни, 150 инсаннансса кIану бусса, ттизаманнул аьралий госпиталь. Комплексрал площадь 27 азарда кв.метралия ливчусса бур. Шикку бур администрациялул ва поликлиникалул корпус, лечебно-диагностический блок, инфекциялул отделение ва палатный модуль.

Корпусрал лагма-ялттусса кIанттурдугу лазилакьи бувну, къашайшалт бялахъансса ва бигьалагансса шартIру дурну дур. Госпиталь дузалну бур аьралийтуран, вайннал кулпатирттан ва аьралий пенсионертуран лавайсса даражалул медициналул кумаг байсса, хъин байсса ва диагноз дишайсса ттизаманнул оборудованиялул. Ва буллалиссаксса хIаллай строительствалул давурттал ялув бацIаву дуллай бия Обороналул министерствалул каялувчитал. Шиккусса строительствалул давуртту дан ишла дурссар ттизаманнул технологияртту.

Госпиталь тIитIлатIисса мажлисрай гьуртту хьунни статс-секретарь, Аьрасатнал обороналул министрнал хъиривчу Анна Цивилева, Дагъусттаннал бакIчи Сергей Меликов, Кьиблалул ­аьралий округрал аьралуннал командующийнан кIанайсса Владимир Кочетков, Аьрасатнал Обороналул министерствалул агьаммур военно-медицинский управлениялул хъунама Дмитрий Тришкин ва Каспийскаллал флотилиялул командующий Олег Зверев.

Корпусраву бур 11 къатта. Агьамми корпусирттаву дур кьамул байсса отделение, мукунна терапиялул, хирургиялул, кожно-венерологиялул ва стоматологиялул отделенияртту. Бур функциональная диагностикалул, физиотерапиялул ва ЛФК-лул пишакартурансса кабинетру. Госпитальданий буссар барокамерагу. Шикку ттизаманнул медициналул кумаг бан хьунтIиссар Каспийскаллал флотилиялул аьралийтуран, агана мукунсса цIунцIияртту ( баротравмы) хьурча.

Хасъсса аьралий операциялий пишалул бурж биттур буллай жанну дуллусса медициналул зузалтрал аьпалун шикку тIивтIунни Вирттаврал аллеягу. Дагъусттаннал бакIчинал сипталий дацIан дунни гьайкаллу хасъсса аьралий операциялий жанну дуллусса ва аьпалул хьуну махъ Къучагъшиврул орденну дуллусса ­Дагъусттаннаясса мукьа медициналул зузалан: чIивима сержант, медициналул роталул водитель-санитар Руслан Рашидхановлун, чIивима сержант, медициналул ­роталул водитель-электрик Рамазан МахIаммадовлун (ванан дуллуссар «За спасение погибавших» медаль), сержант, медициналул роталул водитель-санитар Тимур Аьлиевлун, ефрейтор, медициналул роталул водитель-санитар Якьуб Аьбдуллаевлун ( ванан дуллуссар «За службу на Кавказе» медаль) . Гьайкаллу тIитIлатIисса кIанай гьуртту хьусса жанну дуллуминнал гъан-маччанан дуллунни аьзизминнал аьпалун мюрщисса бюстру.
Ва госпиталь тIитIаву хъанахъиссар Ватан дуручлачиминнан лавайсса даражалий медициналул кумаг бансса ххишаласса хIарачатну. Шикку зун тIий бур чIярусса шиннардил опыт бусса хIакинтал.

Анна Цивилевал ихтилат бунни госпитальданул цалчинсса пациентътуращал ва дуллунни миннан паччахIлугърал ­наградартту.
Сергей Меликовлул барчаллагь баян бунни Аьрасатнал Обороналул министерствалун жула республикалий укунсса даражалул госпиталь бувну тIий.
Дагъусттаннал бакIчинал ва Анна Цивилевал мукунма барчаллагь увкунни проект дурминнахь ва аьралий строительтурахь лавайсса даражалий ва ччясса чIумуй дурсса даврихлу.

– Зу аьралий ягу граждан пишакартал бикIувча, личIишиву дакъассар, зу циняв хIакьину Ватандалул цIаний къуллугъ буллай буссару. Цуксса дакI марцIну, лавайсса даражалий бартбигьлай буссарув зула пишалул бурж, мунийн хъар хъанахъиссар жула мюхчаншивугу, билаятрал цIакьгу, – увкунни медициналул зузалтран тIайлабацIу чIа тIий Сергей Меликовлул ва бахшиш дунни госпитальданун чIирайн лахъансса сурат.
– Дагъусттаннайсса цIусса госпиталь хьунтIиссар медициналул зузалтрал пишакаршиву ва ттизаманнул технологияртту хIала дурхсса, зузалтрангу, пациентътурангу ххуйсса шартIру дусса идарану. Медициналул зузалал пиша ца яла бюхттулмур ва кьимат лаваймур пишари. Му хъиннува исват хьунни хасъсса аьралий операциялий. Барчаллагь зун аьмсса ххувшаву гъан дан бихьлахьисса захIматрахлу, – увкунни генерал-лейтенант Владимир Кочетковлул.
Дагъусттаннал бакIчи Анна Цивилеващал ивунни хасъсса аьралий операциялул гьурттучитурансса 150 инсаннансса кIану бусса реабилитациялул центр буллан тIисса кIанттурдайнгу.

– Жул проект хъинчулий ккавккунни Аьрасатнал президент Владимир Путиннул. Щалагу билаятрай укунсса даражалул центр цалчин жучIава бан най бур. Ттиния тихунмайгу жу хIарачат буллантIиссару Ватандалул мурадру буручлачиминнан циняв шартIру дузал дан, миннан лавайсса даражалул медициналул, психологиялул ва дакI дансса кумаг бан, – увкунни Сергей Меликовлул.