Жула республикалий зурул лажиндарай най дуссия Буттал кIанттул цIанийсса Хъунмассса дяъвилий Ххувшаву ларсун 80 шинан хас дурсса «Нашим героям посвящается» тIисса Дагъусттаннал театрдал дянивсса конкурс.

Ва хьуссар Дагъусттаннал Театрал ишккаккултрал союзрал сипталийну Дагъусттаннал бакIчи Сергей Меликовлул кабакьулийну.

Конкурсрал лагрулий республикалул театрдал коллективрдал ккаккан бунни дяъвилул шиннардий совет халкьуннал чувшиврия ва виричувшиврия бусласисса постановкартту. Театрал магьирлугърайхчил актертурал утта дуккан дурунни сахIналий вирттаврал сипатру, тай оьсса шиннардил гьавасгу ккаккан буллай.

А.Къапиевлул цIанийсса Лакрал театрданул ва конкурсрай ккаккан бунни «Ниттил хъу» тIисса Къиргъизнал чичу Ч. Айтматовлул кьиссалиясса спектакль.

Режиссер-постановщик Ухссавнил АьсатIиннал ва Къабардин-Балкьарнал Республикарттал халкьуннал артист Гиви Валиев.
Итникьини Къумукьнал театрдануву хьунни конкурсрай ххув хьуминнан бахшишру дуллалисса шадлугъ.

«За лучшую женскую роль» бахшишран лайкь хьунни спектакльдануву ниттил роль дургьусса ДР-лул халкьуннал артистка Луиза Шагьдилова.

Шиккува кIицI банну, вава номинациялий Луиза Шагьдилова ттигъанну ххув хьуссар Нальчикрай «Южная сцена» тIисса дунияллул халкьуннал дянивсса фестивальданийгу.
«Ниттил хъу» спектакль бивхьуссар Аьрасатнал Федерациялул Президентнал ГрантрацIух ва Дагъусттан Республикалул бакIчинал кабакьаврицIух.

КIицI бан багьлай бур «Ниттил хъу» спектакль багьну бушиву «Золотой фонд театральных постановок России» тIисса Аьрасатнал Театрал ишккаккултрал союзран 150 шин шаврин хас бувну итабавкьусса проектрал сияхIравун.
ДакIнийхтуну барча тIий жула ххирасса Луиза Шагьдиловахь мяйжаннугу цIуртталну хьусса рольданухлу ларсъсса бюхттулсса награда, чIа тIий буру ттигу чIярусса шиннардий ххаллилсса рольлайну жува хIайран буллансса цIуллушиву ва тIайлабацIу.

Зулайхат Тахакьаева