МахIачкъалалив, ЦIусса никирал библиотекалуву (ЦБС) «Халкьуннал бивкIу бакъашиву ниттил мазравур» тIисса цIанилу дунни Аьрасатнал Халкьуннал мазурдил кьинилун хас дурсса вечер.

Библиотекалул зузалтрал бувсунни Расул ХIамзатовлул цIанийсса литературалул фестиваль нанисса гьантрай гьар шинах укунсса журалул мероприятияртту дувайшиву, дуклаки оьрчIайн ва учительтурайнгу оьвкуну. Гьашину кIицI лавгсса байрандалуцIун дархIуну лахъа-хъунну литературалул фестивальгу дуллай бухьувкун, мероприятиярттал аьдадгу хъун дуршиву цалагу.
Та кьинимур байран дия МахIачкъалаллал 8-мур лицейрал учительтал ва дуклаки оьрчIру гьурттусса. Вечер дачин дурну бия библиотекалул сотрудница Оьмарова Эльмира. Ванил дайдихьу дуллалисса махъ лахълай кIицI лавгунни, библиотека мазру ва культура ядаврил ца кюру хъанахъишиву, рувхIанийсса хъус-ххазина ядаву аьмсса мурад бухьувкун, вава мурадрайсса ххуллий къуццу тIутIиминнащалсса хьунабакьавуртту дуллантIишиву. Ччя-ччяни библиотекалийн хъамал батIлантIишиву.
Хъамаллуравух бия чичулт ва журналистъталгу. Къумукьнал «Елдаш» кказитрал культуралул отделданул хъунама, ­Аьрасатнал Чичултрал союзрал член Яраш Бийдуллаевлул бувсуна миллатрал кказитрал тарихрая, ниттил мазрал учительтуран хIарачатрай зун багьлай бушиврия.

Нагу бувсъссия нава чIярусса шиннардий «Илчи» кказитрай оьрчIансса рубрика дачин дурну бушиву ва ци захIматшивуртту дунугу, буттахъал жунма кьабивтсса ниттил маз буруччин, миннал аманатрайн хиянатшиву къадан шаймур буван аьркиншиву. ХIакьину ниттил мазру ябаншиврул, нитти-буттахъал школардайн, школардал нитти-буттахъайн къабутлай, циняв лагма лавгун, кулпатругу, школардугу, жяматгу хIарачат буллан аьркиншиву. Вава мяъна-мурадрайсса ихтилат бувна яруссаннал «ХIакъикъат» кказитрал корреспондент Надира Амирхановалгу.

Библиотекалул отделданул хъунмур Карият Асильдеровал кIицI лавгунни цуппа Ахвахский райондалиясса бушиву, буттал миналийн лавгтари ниттил мазрайсса гъалгъа оьрчIал зумув бакъашиву кьурчIи бизлай бушиву.
Хьунни ихтилатру ниттил маз дихьлахьисса учительтал цивппагума оьрчIащал оьрус маз хIала бакьлай гъалгъа тIий бушиврия, ниттил маз ххуйну кIулмагу, бувагу къакIулмагу маз буруччин аьркиншиврия буслай бушиву, амма лахьхьин баврия лябукку чIалай бакъашиврия.

Дагъусттаннал миллатирттал мазурдийсса балайрду увкуна балайчитурал Муминат Кьурбановал ва ПатIимат Исяевал.
Мяйлчинмур лицейрал 8-мур классрал дуклаки душ Аьйша Хаммаматовал бувккуна къумукь мазрайн таржума бувсса Расул ХIамзатовлул «КIяла кьурукьру» шеъри.
Гьаннайсса, ва мероприятие хьуна, халкьуннал тарихгу, культурагу, аьдатругу ниттил мазрава нанисса духьувкун, му хъама битан къабучIишиву цал уттигу асар хьуншиврулсса ва лаласуншиврулсса давуну.