Аьрасатнал Украиннал аьрщарай хасъсса аьралий операция баян бувсса чIумал, 2022-ку шинал, хушрай дачIи шинайсса контрактгу чирчуну, билаятрал мурадру буруччин лавгуна Бархъаратусса МахIаммадлул арс, 36 шинавусса Жамалуттин Амирханов.
Контрактрал чIун ларгун, зана хьуну махъ, аьралитуран гуманитар кумаг буллай, хьхьичI ххуттай бавцIуну талатиминнал къучагъшивурттая чичлай ур тIий бавну, жу оьвкуссия Жамалуттиннуйн редакциялийн хъамалу.

– Жамалуттин, байбихьулий кутIану зула кулпатрая, виятува бусарча ччива.
– Ттул нину-ппу Бархъаллал шяравасса бур. Ппу цахъи оьрмулул хъуниминнан ххуйну кIулссар, цила чIумал спортрал ххуллий ванал цIа машгьурну дуссия. Бутта ттун гьарица ишираву эбратну хьуссар. Ванал ппу ХIажи, ттул ттатта, 1944-ку шинал Буттал кIанттул цIанийсса Хъун дяъвилийн лавгссар чил документирттай, оьрмулул чIивисса уну, къауцлай тIий. Миччар жул Амирхановхъул тIисса фамилиялул дайдихьугу хьусса. Ттаттал фамилия цIувххукун цала бу­ттал цIа бувсун бур. Мунийнин жу ХIажиевхъул бивкIун буру. Ттатта Берлиннайн ияннин лавгссар. Дяъви къуртал хьуну махъгу тийхва къуллугъ буллай авцIуну, 1952-ку шинал зана хьуссар. Ванал ппу Амирхан Октябрь революциялул иширттавух гьуртту хьуссар, Буттал кIанттул цIанийсса Хъунмасса дяъвилул шиннардий захIматрал фронтрай ивкIссар. 2000-ку шинал оьрмулул 105 шинаву аьпалул хьуссар.
На нава увну ура Астраханнай, бутта институт къуртал бувну махъ тихун гьан увну.
Хасъсса аьралий операция байбивхьусса чIумал ттун пикри хьуна: оьрмулул 16 шинаву ттула ттатта Ватан дуруччин лавгун ур. Ттувувагу бикIан аьркинни буттал буттахъавусса яхI, Ватандалул цIаний ацIансса чувшиву. Ва ялагу, ттун дакIнин багьунни Авгъаннал аьрщарай аьралий бурж бартбигьлай жанну дуллусса чIявусса ттула гъанчув, шяравасса оьрчIру. Ччан бивкIуна ттула агьулданул чиваркIуннал яхI ттувувагу бушиву, иш багьний навагу Ватандалул цIаний ацIан хIадуршиву ккаккан бан. Укун, хасъсса аьралий операция байбивхьуну ца-кIива зурува, апрельданул 26-нний, контракт чирчуну, апрельданул 29-нний на Украиннал аьрщарайн увкIра. Буттахь дазуйн най ура учав. Уссурваврахь ва гъан-маччанахь учав строительствалул давурттайн най ура куну. Къуллугъ буллай усси­яв 177-мур полкраву, хьхьирил бахьттагьалтрал подразделениялуву Запорожскаллал областьрай, Гуляй-поле тIисса кIанттурдая арх дакъа дирхьусса Червонное тIисса шяраву. Тикку жун ккаккан дур­сса лахъазан дугьан багьлай бия. ДачIи шинай кьянкьану бавцIуну канища дуккан къариртссар. Мунияр махъ Работино тIисса шяравун бивчунав. Контракт къуртал хьуну зана шайхту, гуманитаркалуха зун ивкIра. Ттула аьралий дустал захIматсса тагьар дусса Курдюмовка, Горловкалийн бивчусса чIумал, тиккун гуманитар ­кумаг, хъунмурчIин медикаментру, щавурду дахIин аьркинмур диян дан лавгра.

На нава­ инже­не­р-строительла. МахIачкъала­ллал 7-мур школа къуртал бувну махъ, буттал шаттирдайх лавгун, Дагъусттаннал политехнический институтрал строительный факультетрайн увхссара. Дуклакисса шиннардий бутта зузисса строительный компаниялийн практикалийгу занай икIайссияв. Институт къуртал бувну махъ строительствалул давурттаха зий ивкIра. Занай уссияв каратэ-долул секциялийн. Ппу му спортраву цIа дурксса, хьхьичIунсса спортсментал хIадур бувсса тренерди. Каратэ-долуя махъ дзюдорал, каруннай бияврил, панкратиондалул тренерну уссия. Аьбдулманап НурмахIаммадовлущал ва цайминнащал тIивтIуссия цалчинсса панкратиондалул школа. Цува дуклай ивкIсса Политехнический институтраву – спортзал. ХIасил, опыт бу­сса, хIал кIулсса буттал шаттирдайх най на тачIав къааьвкьуссара, тачIав пашман къавхьуссара. 2008-ку шинал кулпат бав. Му шанна-мукьра шинал хьхьичI, жагьилсса оьрмулуву, кIива оьрчIгу кьабивтун дунияллия лавгунни. ОьрчIал тарбиялул хъаргу щалла ттунна лахълан багьлай бур.

– Буси цIанасса вила къайгъурдая.
– Гуманитар кумаг тIайла буккаву бакъассагу, на чичлай ура хьхьичI ххуттай бавцIусса жула аьралитурал чувшиврия. Чичара назмурдугу.
Гуманитар кумаг биян бан мудан гьан къашай. Ттула дустурайхчин, кIулминнайхчин аьрай аьркин дагьлагьимур: дука-хIачIанмур, лахха-ликканмур, хъунмурчIин даруртту тIайла бу­ккара. Ккавккун кIулли хьхьичI ххутай бавцIуминнан яла-яла ци аьркинссарив.

– Цукун бакIрайн агьра Граждан журналистикалул школалийн? Ци учинна муния?
– Граждан журналистикалул школалийн тIайла ацIан укун­сса иш савав хьуссар. Гуманитар кумагращал СВО-лийн нанисса чIумал «Дагестан» ГТРК-лул тавакъю бувна, Дмитрий Пайгозиннуя ва хьхьичI ххуттай бавцIусса жула ­аьралитурая хъун дакъасса ролик ласи куну. Ларсъссия. Мукунна ларсъссия хушрай аьралий операциялийн бувкIун, передовойлий, нигьачIисса, захIматсса шартIирдай аьралитуран медициналул кумаг буллалисса, мунихлу президентнал «За спасение погибающих» медаль дуллусса жагьилсса медсестра Бадия Валиеваягу. Профессионалтал гьуртту хъанахъисса «Голос Евразии» конкурсрай, 300-нния лирчусса давурттаву ттул даврин лавайсса кьимат бивщуна. Дуллуна приз. Аьралитурая чивчусса ттул материаллу ккарксса дустуралгу маслихIат бувна Граждан журналистикалул школалийн уххан. Школалул агьаммур мурад ттун ххуй бивзуна: профессионал кIулшивуртту къаларсъсса, амма дакI цIуцIисса, хъанахъисса иширттал хIакъираву цала пикри бусса инсантал цачIун бувну, миннахьхьун цаламур махъ бусансса сант дулаву. Укунсса чIумал ялун личайссар итххявхсса, цайминнаха къалавхьхьусса цала пикри бусса, ляличIисса инсан, самородок. Жущал опыт кIибачIлай бия оьрмулуву лайкьсса кIану бувгьусса, цала даража ккаккан бан бювхъусса инсантал. Ттун минная чIявусса затру лавхьхьунни
– Уттигъанну Москавлив инава гьуртту хьусса форумраягу бувсун ччива.

– Октябрь зурул 13-15-нний БивкIу бакъасса полкрал сипталий ва сакиншиннарай Москавлив хьунни СВО-лул гьурттучитал цачIун бувсса творчествалул форум. Му хьунни Щалагу Аьрасатнаву нанисса «Пробуждай сердце» тIисса конкурсрал лагрулий. Шикку гьуртту хьун бувкIун бия Москавлия, Питердая, Астраханная, Карелиянава, сайки циняв Аьрасатнал регионнаясса СВО-лий бивкIсса жагьилтал. Вайннавух ия 300.30.3 тIисса балайлул автор Александр Ванюшкингу. Шанттурша инсаннава 19 язи увгьуна. Цинявппагу гьурттучитал бия саллатIнал ххуллу бивтсса, цала яруннин дяъвилул сичча ккарксса, дакI цIуцIисса. Вайннал произведенияртту бия Ватандалухсса ччаврил гьавас бутлатисса. Вечер хьунни Вахтанговлул театрдануву. Ккалай бия цала чирчусса назмурду, тIий бия цала ляхъан бувсса балайрду. Циняв хъинну бюххансса, асар хьунсса бия. ЧIявуми гьурттучитал бия хасъсса аьралий операциялий мушакъат хьусса, амма яхI гъагъан, ссалчIав лахIан бан къабавцIусса кьянкьуштал. Утти творчествалул ххуллийх нанисса ва гихунмай жагьилсса ник тарбия даврил хъар лахъан дакIнийсса.

– Вила пикрилий ми эбратну хъанай бурив цIанасса ­жагьилтуран, ялун нани­сса никиран? ЧIявусса бурив цIана жагьилминнаву хушрай ­хасъсса аьралий операциялийн бачин хIадурсса?
– Спецоперация – жула ­би­лаят щалагу дунияллийн данди бацIаврил ца бутIа хъанай бур. Тийх бивкIминнан, тай оьхIалшивуртту ккаркминнан ххуйну бувчIлачIиссар, кIулссар цивппа ссахлу талай буссарив.
Гьич, арцух бакъар ми жандалий хIайп къакуну талатисса. Хушрай хасъсса аьралий операциялийн лавгун тийх жанну дуллунни арцух мюхтажшиву дакъасса кулпатирттавасса, гъан-маччами къуллугъирттайсса, къалавгун битантIисса оьрчIал.Ттун кIулли сайки шанна шинай хьхьичI хху­ттай бавцIусса, цимилгу щавурду дирну дунура ца ша махъунмай къалавсун, кьянкьану бавцIусса къучагътал. Ва чувшиврул, ватан ххирашиврул барашиннар. ЦIанасса дяъвилул захIматшиву, ляличIишиву му дур, цайми дяъвирдай кунма инсан инсаннайн данди авцIуну акъар, жунма щалагу дунияллул технологиярттащал, разведкарттащал, ярагъуннищал талан багьлай бур. Дяъвилул ахир хьунссар кнопкарттай кIисри бизанми бухлавгсса чIумал.
Нава тийх усса ппурттуву, жул гужру ххишаласса душманнащалсса данди бацIаву хьуна. 7-8 инсаннайн гьужум бувна душманнал артиллериялул, техникалул, 150-нния ливчусса аьралитурал. Цаягу жула аьраличу ца шаттирал махъунай къавхьуна. Учин ччимур муври, жула аьралитурал дакI дуссар, вайннан цивппа ссал цIаний талатиссарив кIулссар, душманнал чулух тIурча, акъассар цаягу саллатI идеялухлу талатисса. Муври жулагу, украинналгу аьралитурал личIишиву. Цуксса гуж бусса, хьхьичIунсса ярагъ булурчагу, бакъассар тайннаву гьавас.
Ялагу учивияв, оьрмулул ва бивкIулул ххуттай бавцIусса аьралитуран асар хъанахъиссар халкьуннал дакI цIуцIаву, чIарав бацIаву. Хъунаная чIивинайн бияннин буллалисса кумаг, мюрщи оьрчIал дакIнийхтуну чивчусса чагъарду.
На ябувну ура дачIи шинал дянив ттучIанма бувкIсса чагъарду. Ца чагъар бия Сергокъалаллал райондалиясса. На та душничIан хъамалу лавгра, барчаллагь учав. ВайминначIангу гьансса пикри бу­ссар. Зу вих къахьунссару, автомат кIунттил бувгьуну цIаравух уклакисса, чIярусса захIматшивуртту духIан багьлагьисса саллатIнал иттату макь дачайва дуклаки оьрчIаясса чагъарду ккалаккисса чIумал. Вари дакI даву.

– Аьралитурансса гуманитарка щаллу бан щил кумаг бай вин?
– ЛичIи-личIисса инсантурал. Куннал арцуйну, куннал аьркин дагьлагьимунийну. Уттигъанну на лавгссияв Национальный инновационный колледжравун студентътуращал хьунаакьин оьвтIий. Гуманитарка лавсун нанисса бусайхту, жунгу жула чулуха кумаг бан ччива, ци аьркинссарив сияхI дула увкунни. ДачIи ссятрал дянив 20 азарда къурушрансса медициналул препаратру, антисептикру ва цаймигу затру ларсун дуллунни. ЩихьчIав дулара тIун къабагьай, цивппа лавсун бучIай. Укунсса иширтталли жула аьралитуравун дунияллул 50 хIукуматрайн данди бацIансса гьавас бутлатисса. «Аьралуннал чул бувгьусса халкь бусса билаят бух бан къашайссар», – увкуну бур цумарив полководецнал.
Му тIайлассар.

Андриана Аьбдуллаева