МахIачкъалалив Аьралийтурал-интернационалистътурал паркраву, хьунни генерал-майор Оьмар Муртузаьлиевлун 100 шин шаврин хас дурсса митинг. КIицI лаган, ва паркран генералнал цIа дуллуну дуссар.
Митинграй гьуртту хьунни Дагъусттаннал бакIчи Сергей Меликов, личIи-личIисса идарарттал ва жяматийсса организациярттал вакилтал, генералнал гъан-маччами, дуклаки оьрчIру. Авгъан дяъвилул гьурттучи, отставкалийсса аьралий генерал Оьмар Муртузаьлиев кьунияхъайсса шиннардий республикалий краевед-следопытътурал телевизионный кьюкьрал суккушиннаращал зий ивкIссар. 1998-ку шинал Дагъусттаннай цалчинсса мукунсса кьюкьа сакин дурсса Николай Подорожный аьпалухьхьун лавгун махъ, ТОКС-рал командирну Оьмар Муртузаьлиев ивтссар.ТОКС-рал суккушинна Дагъусттаннай зун диркIссар 1970-ку шинал. Оьмар Муртузаьлиевлул хIарачатрай ва республикалул каялувчитурал кумаграцIух Дагъусттаннай гьарица шинах дайссия токсовцынал слетру, бувну буссар ва суккушиннарал музей. Му буссар «Альтаир» тIисса оьрчIал гьунарду итххяххан байсса центрданий. Кьюкьлувусса оьрчIал хIарачатрайну салкьи дурссар 25 азарунния ливчусса Буттал кIанттул цIанийсса Хъунмасса дяъвилий гьуртту хьусса дагъусттанлувтураясса материаллу. Гьайкаллай абад дан бювхъуссар 300-нния ливчусса цIарду, итадаркьуссар «ТОКС ведет поиск» тIисса 500 передача, мукунма итабавкьуссар «Книга памяти» луттирал 12 том ва «Солдаты Отечества» тIисса луттирал 17 том. ЦIанасса чIумал ТОКС-раву бур хъиривлаявуртту ва ахттаршиннарду дуллалисса 2500-нния ливчусса дуклаки оьрчIру. Шивун духлай дур республикалул школардайсса 126 кьюкьа. Миннуй каялувшиву дуллай бур 90-нния ливчусса преподавательтал.
Митинграй Оьмар Муртузаьлиев дакIнин утлатисса ихтилат бунни Сергей Меликовлул.
– Ванал цIа дархIуну дуссар жула тарихрацIун, Авгъаннал халкьуннан интернационал кумаг буллай бивкIсса иширттацIун, республикалий ТОКС-рал суккушинна чялиш дуккан даврицIун. Оьмар Муртузаьлиевлул каялувшиннаралу дуклаки оьрчIал салкьи дурссар Буттал кIанттул цIанийсса Хъунмасса дяъвилий талай бивкIсса азарахъул дагъусттанлувтураясса материаллу.
ХIакьину токсовцы кумаг буллай бур хасъсса аьралий операциялул гьурттучитурал кулпатирттан. Оьмар Муртузаьлиевлул цала хъирив кьабивтссар архиврду ва музейрду, яла-яла ванал кьариртссар ялун нанисса никираву Ватандалухсса ччаву. Му журагу никирая никирайн диян дуллан аьркинссару, – увкунни республикалул бакIчинал.
Андриана Аьбдуллаева
