Октябрьданул 15-нний, СВО-лул Аьрасатнал Виричу, хъунама лейтенант МахIаммад Исбакиевлул чувшиврий жан дуллуну, шанна шин хъанахъисса кьини Москавливсса «Дагъусттан» Культуралул центрданул вакилтал бивунни Мытищи шагьрулийсса ванал гьаттайн. Шикку хьунни Виричунал ­оьрмулул ххуллия бусласисса, ванал гьунарданун кьимат бишлашисса ихтилатру, гьаттацI тIутIив дирхьунни.
Дагъусттаннал диаспоралущал архIал Виричунал гьаттайн увкIун ия ПаччахIлугърал Думалул депутат Султан ХIамзаевгу.
Октябрьданул 19-нний тIурчарив, кIицI лавгсса центрданул вакилтал хьунабавкьунни Виричунал нину Марина Исбакиеващал. ДакIнин бутанна ва ЧукIнатусса бушиву, МахIаммадлул ппу – яруссаннал Аймаки шяравасса.
Центрданул президент, профессор Арсен ХIусайновлул барчаллагь увкунни хасъсса ­аьралий операция байбивхьусса кьинилия шинай талай ивкIсса Виричусса арс тарбия увсса ниттихь, бувсунни центрданул СВО-лун ва СВО-лий гьуртту хъанахъиминнал кулпатирттан, госпитальлай хъин хъанахъиминнан цукунсса кумаг буллай буссарив. КIицI лавгунни, центрданул вакилтал Дагъусттаннал кьюкьлувух гуманитар гьиву диян дуван лавгшиву.
Центрданул вице-президент Астемир Шайхалиевлулгу барчаллагь увкунни цала жандалий хIайп къакуну аьралий гьалмахтал ххассал бувсса арс тарбия уваврихлу.
«Марина Абсалуттиновнайнгу, Вирттал тарбия бувсса циняв ниттихъайнгу жува барчаллагьрай бикIантIиссару мудангу. Вайннал оьрмулул ххуллурдая, чувшивурттая чара бакъа ялун нанисса никирахьгу буслан аьркинссару. Вирттаврал Ватандалул мурадру буруччаврил цIаний жанну ххира къадурнутIий, гъалбарцIру кунма цIаравун ххявххунутIий», – увкунни ванал. Вава мяъна-мурадрайсса ихтилат бунни Абас Аьлишаевлулгу, циняв душвавралгу. Марина Исбакиевалгу барчаллагь увкунни Москавливсса дагъусттанлувтурахь, чувшиврий ливтIусса жагьилтурал аьпа уттава буллалисса давурттахлу.
«Ттунгу, гьарца ниттин кунма, утти яла агьаммур – арс хъама къаитавур. Агар жул арсру дакIний бухьурча, ми хъама къабитансса давуртту дуллай бухьурча, му чIумалли жувугу яхъанансса яхI багьлагьисса», – увкунни ванил.
ДакIнин бутанна, хIаписар – разведчик МахIаммад ­Исбакиевлул гьунардания Аьрасатнал президент Владимир Путиннущалсса хьунабакьаврий бувсшиву МахIаммадлущал талай ивкIсса майор Денис Диденкол.

ПатIимат Рамазанова