Гьарица шинах октябрьданул 24-нний Аьрасатнаву кIицI лагайссар спецназрал подразделениярттал пишалул байран. Ва кьини Дагъусттаннай региондалул бакIчи Сергей Меликовлул тапшур бувну, ЗахIматрал ва социал иширттал министерствалул зузалт бивунни хасъсса аьралий операциялий жанну дуллусса спецразведкалул аьралийтурал кулпатирттачIан.

– Аьралуннал спецназ – ми яла лаваймур даражалул инсанталли. Щалагу дунияллийсса аьралуннал данди бацIавурттаву ва операциярттаву савсъсса ва опыт бусса аьралийтал хIакьину хасъсса аьралий операциялийгу цала бюхъу-бажар, даража хъиннува гьаз буллай бур. Гьарица аьраличу чувшиврул эбратну хъанахъиссар. Гьарицама цила икIайкунсса виричури, – тIий ур Дагъусттаннал бакIчи Сергей Меликов.
Министерствалул зузалт бивунни Каспийскалиясса, Аьрасатнал Виричунал цIа ларсъсса Фархад Худайнатовлул, Дагестанские Огнилиясса Аьли Муртузаьлиевлул, Избербашлиясса Рашид Салаватовлул гъан-маччаначIан.
Москавлив хьунни Аьрасатнал Виричу МахIаммад Исбакиевлул ниттищалсса хьунабакьаву.
– Ведомствалул зузалтрал вайннал бусласимунихгу вичIи дирхьуну, багьлагьисса социал кумаграл хIакъираву бувчIинбавуртту дунни. Янна дуруххаврихун багьсса ца ­аьраличунал кулпатран социал контракт чичин ччай бур. Мунин аьркинсса консультация дантIиссар. Цама аьраличунал ниттил тавакъю бунни цала райондалий арснал цIа абад дансса чаран лявкъуну ччива куну. Жу мигу, цаймигу вайннал масъалартту чара бакъа щаллу бантIиссар.
ДакIнийхтунусса барчаллагьгу баян буллай, чIа тIий ура цIуллушиву ва тIайлабацIу хIакьинусса кьини спецназрал подразделениярттаву къуллугъ буллалиминнан, – увкунни Сергей Меликовлул.
Андриана Аьбдуллаева