Ва сфералуву зузиминнал пишалул байрандалун хасну январьданул 13-нний МахIачкъалалив Информациялул ва печатьрал агентствалул актовый залдануву хьунни Прессалул бал.
Мероприятиялий гьуртту хьунни Дагъусттаннал ХIукуматрал председатель­нал хъиривчу Нариман Аьбдул­мутIалибов, аьрщарал ва хъуслил арардал министр Заур Эминов, цифрардал лябуккулул министр Юрий ХIамзатов ва Информациялул ва печатьрал агентствалул каялувчи Аьбдуразакь Жамалуттинов.
Мажлис тIитIлай, ихтилат бунни Аьрасатнал Журналистътурал союзрал региондалул отделениялул каялувчи МахIаммад Ибрагьимовлул. Ванал бувсунни Аьрасатнал Журналистътурал союзрал Дагъусттаннал отделениялул тарихрая ва ккаккиярттая. ХьхьичIунсса журналистътуран дуллунни Союзрал чулухасса наградартту.
Республикалул СМИ-дал зузалт пишалул байрандалущал барча буллай, республикалул къуллугъчитурал лавайсса кьимат бивщунни миннал даврин. КIицI лавгунни миннал даража, усттаршиву, тIайлашиву. Пишакаршиврул даража лавайсса, захIматрал ххуллий ххуй­сса ккаккияртту чIалачIи дурсса СМИ-дал зузалтран дуллунни личIи-личIисса наградартту. Ми дия Информациялул ва печатьрал агентствалул, Журналистътурал союзрал, личIи-личIисса министерстварттал ва ведомстварттал чулухасса.
Наградартту ларсминнавух чансса бакъая лак, миннавух бия «Илчи» кказитрал зузалтгу. «Илчи» кказитрал редакциялун Барчаллагьрал чагъар буллунни Цифрардал лябуккулул министерствалул чулуха.
Барчаллагьрал чагъарду ва ХIурматрал грамотартту дуллунни отделданул редактор Андриана Аьбдуллаеван (Дагъусттаннал МЧС-рал ва Росгвардиялул управлениялул чулуха), отделданул редактор ПатIимат Рамазанован (Миллатрал политикалул ва диндалул ишир­ттал министерство), отделданул редактор ХIасан Аьдиловлун (Шяраваллил хозяйствалул министерство), корреспондент Залму АьбдурахIманован (ПаччахIлугърал Думалул депутат Д. ХIасановлул чулуха), корреспондент Имара Саидован (Экономикалул министерство), дизайнер Зинфира ХIажиеван (Информациялул ва печатьрал агентство).
Ва кьини бусравсса наградартту ларсунни лакрал миллатрал вакилтурал: «Дагестан» ГТРК-лул хъунаманал хъиривчу Салам Хавчаевлул, «НТВ» телекомпаниялул собкорр ­Оьмар МахIаммадовлул, «Дагестан» ГТРК-лул лакку мазрайсса вещаниялул хъунмур редактор Тамара Закарьяевал, «Дагестанская правда» кказитрал журналист Сабина Исрапиловал.
Барча буллай буру жула коллегахъул пишалул байрандалущал ва лайкь дурсса наградарттащал.
Андриана Аьбдуллаева