Август зурул 22-нний ЦIуссалакрал райондалий ЦIусса­чIурттащиял 2-мур школалул хIаятраву, Аьрасатнал Виричу А. В. Козиннун дацIан дурсса гьайкалданучIа хьунни Аьрасатнал ПаччахIлугърал Ттугълил кьинилун хас дурсса акция. Шиккува кIицI лаган, ЦIуссалакрал райондалийсса ЦIуссачIурттащиял 2-мур школа 1999 шиналсса дяъвилул иширттаву къучагъшиврий жан дуллусса лейтенант Алексей Козиннул цIанийссар.

Акциялул сакиншинначитурал дуклаки оьрчIащал архIал, ттугъру цачIун бувну, хIасул дунни «Аьрасат» тIисса цIа.
Сентябрь зуруй 22 шин барт­лаглагиссар жула аьрщарайн ххявхсса дунияллул терро­ристътал ххит бувну. Цинявннан ххуйну дакIнийссар жула халкьуннайх кьини дурксса та дяъвилул гьантри. Тай ишир­ттаву ЦIуссалакрал райондалул агьалинал ва Дагъусттаннал халкьуннал ккаккан дур­ссия хIат-хIисав дакъасса чувшиву, цашиву, кувннал кув бугьаву. Мугу хIисавравун лавсун, пикри хьу­ссия Аьрасатнал ПаччахIлугърал Ттугълил кьини ва акция боевиктурайн данди авцIуну жан дуллусса Виричунал гьайкалданучIа дуван.
1999 шинал Алексей Козин танкрал взводрал командирну гьан увну ивкIссар Дагъусттаннайн. Шикку ва гьуртту хьуссар Чачаннал дазул патрулданийсса аьрали операциярттавух. Сентябрь зурул 5-нний гьуртту хьу­ссар мукуна ЦIуссалакрал райцентрданий хьусса къачагътурал кьюкьращалсса талатавривугу. Талатаву гужлан хьусса ппур­ттуву щавурду дирсса аьралитурайн лихъансса амругу бувну, Козин, цувама авцIуну ивкIун ур цинявппа мюхчан буллай. ЦIуссалакрал район душмантурая мурахас дурсса чIумал, пIякь увкусса танкалия арх дакъа, ляркъуссар лейтенант Козиннул нурчIи.
1999 шинал ноябрь зурул 12-нний АьФ-лул Президентнал указрайн бувну, дяъвилул иширттаву ккаккан дурсса къучагъшиврухлу, Алексей Козиннун (ивкIуну махъ) дуллуссар Аьрасатнал Виричунал цIа.
Акциялул сакиншинначиталну бия ЦIуссалакрал райондалул администрация, Райондалул Культуралул, жагьилтурал политикалул, спортрал ва туризмалул управление, ЦIуссачIурттащиял 2-мур школалул педагогтал.