Дагъусттаннал бакIчинал чIумуйсса кIанайма Федор Щукиннул ва Аьрасатнал Президентнал Администрациялул каялувчинал цалчинма хъиривчу Сергей Кириенкощал цачIу ххал бивгьунни Дагъусттаннал лябуккулул масъалартту. 

Федор Щукиннул бувсунни региондалий бартдигьлай бушиву хъунисса инфраструктуралул проектру ва дузал дуллай бушиву.
Кириенкол лавайсса кьимат бивщунни тIабиаьтрал биян бувсса зараллу бухлаган буллалисса давурттан – социал объектру ва инсантурансса къатри даврил давуртту иширайну къуртал хьуну душиврун. Региондалул каялувчинал Кириенкохь бувсунни мукунма «Команда Дагестана» тIисса кадрардал программалиягу.
«Конкурсрайхчил язи бугьару цала кIулшивуртту ва опыт жула республика лядуккан даврил цIаний ишла буван хIадурми. Конкурсрай гьуртту хъанахъиминнащал ихтилат на нава бара. Жула аьмсса мурадну хъанахъиссар Дагъусттаннай хIасул дуван инсантал гъирарай ялапар хъанансса, инвестортал букIлансса, жула хъамал цIунилгу зана хьуну бучIавансса шартIру», – увкунни региондалул каялувчинал.