Дагъусттаннал Элмулул ва кIулшиву дулаврил министерствалул ЕГЭ-рдал хIасиллу дунни. Вайннал бувсмунийн бувну, школа къуртал бувминнаву чIявуссаннал язи дургьуну дур химиялул, биологиялул ва обществознаниялул экзаменну.

– Республикалий хIакиннал пиша язи бугьан ччисса чIявусса бушиву чIалай бур вай экзаменну язи дугьаврийну. Мукунма школа къуртал буллалиминнал диялсса къулагъас дур литературалул, физикалул, тарихрал ва информатикалул экзаменнах. Ингилис мазрал экзаменгу шиная шинайн машгьур хъанай дур, гьашину 6% ххишаласса выпускниктал ва экзамендалий бавцIунни, – чIурчIав дурна вайннал.
ДакIнин бутанну, уттисса ЕГЭ-рдай 49 выпускникнал 100 балл лавсшиву, вайннавагу 16 выпускникнал – оьрус мазрал экзамендалул. МахIачкъалалив кIилийну гьаз хьуну дур 100 балл лавсминнал аьдад. Ларгсса шинал 11 выпускник – стобальник уссия, гьашину – 23. МахIачкъалалив аьмну хIисав бувну выпускниктал бур 13, 5 азара, вайннавугу 270 – мусил медальлу ларсми. Шама выпускник ур 200-200 балл лавсъсса.
ПатIимат Рамазанова