Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрай, июль зуруй дурсса даврил хIасиллайн бувну, кьамул увну ур 363 030 пассажир. Ларгсса шинал вара чIумух бурувгун 8,3 % ххишаласса.
Июль зуруй аэропортрай дурну дур 2647 рейс, ларгсса шинал вара чIумух бурувгун 5,6 % ххишаласса. Зурул мутталий кьамул дурну дур 388,8 тонна кьай-кьуйлул ва почталул. Вайгу ларгсса шинал вара чIумущал цачIу дирхьуну 17 % ххишаласса хъанай дур.
Июль зуруй яла чIявусса пассажиртал ххилай диркIсса авиакомпанияртту дур «Победа», «Аэрофлот», «Северный ветер».
Пассажиртурал дянив яла тIалавми рейсру дур Москавлийн, Санкт-Петербурглийн, Сургутлийн, Къазаннайн, Новосибирскалийн, чил билаятирттайнсса рейсирдава – Стамбуллайн, Дубайлийн, Бакуйн ва Ташкантлив.
МахIачкъалаллал аэропортрай ттигу тIитIлайнма бур цIусса рейсру. Ванийн бувну, хъуннасса бигьашиву хъанай дур личIи-личIисса регионная жула республикалийн букIлакIисса инсантуран, хаснува туристътуран.
ЦIанасса ппурттуву МахIачкъалаллал аэропорт ккаллину бур СКФО-рай яла чIявуми пассажиртал кьамул буллалиссаннун.
Имара Саидова
